Baqyrshyq ken ornynda altynnyń alǵashqy tonnasy óndirildi - ShQO

ÓSKEMEN. QazAqparat - Shyǵys Qazaqstan oblysy Jarma aýdanyndaǵy «Baqyrshyq taý-ken óndirý kásipornynda» altyn metalynyń alǵashqy tonnasy óndirildi, dep habarlaıdy QazAqparat altaynews.kz saıtyna silteme jasap.

Baqyrshyq ken orny ústimizdegi jyldyń 25 maýsymynda saltanatty jaǵdaıda iske qosylǵan bolatyn.

Ken orny altyn óndirýdiń óte kúrdeli tehnologııasymen sıpattalatyny belgili. Kenishtiń jarty ǵasyrlyq tarıhy bar. Biraq «Polımetall» kompanııasyna deıin qymbat metaldyń aýqymdy óndirisin bul jerde eshkim iske asyra almaǵan.

Aıtýly oqıǵanyń qurmetine ken-baıytý kesheniniń tsehynda «Baqyrshyq taý-ken óndirý kásiporny» JShS-niń barlyq bólimsheleriniń qatysýymen mıtıng ótti. Onda «Polımetall ÝK» AQ bas dırektorynyń óndiris jónindegi orynbasary Vıtalıı Savchenko men Jarma aýdanynyń ákimi Nurlan Sydyqov quttyqtaý sóz sóıledi.

«Baqyrshyq ken ornyn ıgerýdiń kóp jylǵy tarıhynda alǵash ret baǵaly metall neǵurlym iri mólsherde óndirilip otyr. Bul Qazaqstandaǵy qory baı ken oryndarynyń birinde ónerkásip óndirisiniń bastalǵandyǵyn kórsetedi», - dedi aýdan ákimi Nurlan Sydyqov.

Aıta keteıik, Baqyrshyq ken orny bıyl Shyǵys Qazaqstan oblysynyń 273 mektebinde robototehnıka synyptaryn jaraqtandyrdy. Bul tizimde Jarma aýdanynyń 14 mektebi de bar.