Baqylaý-kassa mashınasy cheginde satyp alýshynyń JSN-i kórsetilýi kerek pe

ASTANA. QazAqparat - Áleýmettik jelilerde azamattar keıbir dúkenderde satýshylar saýda jasaǵannan keıin satyp alýshylardan JSN berýdi talap etetinin aıtyp, shaǵymdanýda, dep habarlaıdy QazAqparat.

Osyǵan oraı, Memlekettik kirister komıteti mamandary baqylaý-kassa mashınasynyń cheginde satyp alýshynyń JSN-i qaı kezde kórsetilýi kerektigin túsindirdi.

«2022 jyly derekterdi tirkeý jáne berý fýnktsııasy bar baqylaý-kassa mashınalaryn (BKM) qoldaný tártibine ózgerister men tolyqtyrýlar engizilgen. Salyq kodeksiniń 166-baby 5-tarmaǵynyń 2) tarmaqshasyna sáıkes BKM qoldaný kezinde taýarǵa, jumysqa, kórsetiletin qyzmetke tólengen somaǵa BKM chegin nemese taýar chegin berý júzege asyrylady. Salyq kodeksiniń 166-babynyń 6-tarmaǵyna sáıkes BKM cheginde kórsetilýi tıis aqparat tizbesi belgilengen.

Óz kezeginde, Salyq kodeksiniń 166-baby 7-tarmaǵyna sáıkes onlaın-BKM cheginde satyp alýshynyń (klıenttiń), taýarlardy, jumystardy, kórsetiletin qyzmetterdi alýshynyń talaby boıynsha satyp alýshynyń, alýshynyń sáıkestendirý nómiri (JSN) kórsetilýi tıis», - dep jazdy vedomstvodan.

Osylaısha, taýardy satý (jumysty oryndaý, qyzmetti kórsetý) kezinde satýshy BKM chegin berýge jáne tek qana satyp alýshynyń (klıenttiń) talaby boıynsha BKM cheginde satyp alýshynyń (klıenttiń), alýshynyń JSN nómirin kórsetýge mindetti.

Ashyq kózderden alynǵan foto