Bakýdegi Túrki keńesinde birlesken sharaǵa daıyndyq barysy talqylandy
Qazaqstan atynan din jáne azamattyq qoǵam vıtse-mınıstri Berik Aryn men Túrkııa, Ázerbaıjan, Qyrǵyzstan jastar jáne sport boıynsha memlekettik organdarynyń basshylary qatysty.
Otyrys barysynda qatysýshylar jastar jáne sport salasyndaǵy yntymaqtastyq jónindegi jumys tobynyń qyzmetin retteıtin qujatty, Túrki keńesiniń jastar platformasy reglamentin maquldap, Túrki keńesi elderinde birqatar iri birlesken sharalar júrgizýge daıyndyq barysyn talqylady. ІІІ Dúnıejúzilik kóshpendiler oıyndary, І Túrki ýnıversıadasy, Túrki keńesiniń І jastar festıvali jáne t.b.
Óz sózinde B. Aryn qatysýshylardy «Bolashaqqa kózqaras: qoǵamdyq sanany jańǵyrtý» atty QR Prezıdenti N. Nazarbaevtyń baǵdarlamalyq maqalasynda aıtylǵan negizgi bastamalarymen tanystyrdy. Sondaı-aq ulttyq tarıhty, dástúrdi jańǵyrtýda, mádenıet eskertkishterin saqtaýda Túrki keńesi elderimen yntymaqtastyqtyń mańyzdylyǵyn atap ótti.
Ol sondaı-aq túrkitildes elderdi Aqmola oblysy Zerendi aýylynda 2017 jylǵy 10-16 shilde aralyǵynda ótetin Túrki keńesine qatysýshy elderdiń ІІІ halyqaralyq jastar jazǵy lagerine belsendi qatysýǵa shaqyrdy.
Óz sapary aıasynda vıtse-mınıstr Ázerbaıjannyń dinı uıymdarymen jumys boıynsha memlekettik komıtetiniń tóraǵasy Mýbarız Gýrbanlymen ekijaqty kezdesý ótkizdi. Onda dinı uıymdardyń qyzmetin retteý máseleleri men osy saladaǵy eki eldiń tájirıbesi talqylandy.
Budan basqa, Baký memlekettik ýnıversıtetiniń janyndaǵy Abaı ortalyǵyna baryp, rektory Abel Magerramovpen kezdesti. Jastardyń ulttyq mádenıet pen dástúrge súıispenshiligin daǵdylandyrýǵa baǵyttalǵan jobalardy iske asyrý boıynsha yntymaqtastyq týraly ýaǵdalastyqqa qol jetkizildi.