Bakýde túrki álemin zertteý jónindegi halyqaralyq sımpozıým ótip jatyr

BAKÝ. QazAqparat - Búgin Ázerbaıjan astanasynda túrki álemin zertteý jónindegi altynshy halyqaralyq sımpozıým óz jumysyn bastady, dep habarlaıdy «QazAqparat» HAA-nyń Ázerbaıjan Respýblıkasyndaǵy menshikti tilshisi.

Sharaǵa Túrkııa, Qazaqstan, Ázerbaıjan, Qyrǵyzstan, Ózbekstan, Tatarstan jáne Bashqurtstan Respýblıkalarynyń 400-ge jýyq adam qatysty. Olardyń deni memleket jáne qoǵam qaıratkerleri jáne ǵalymdar bar. Olardyń 40-tan astamy Qazaq ulttyq qyzdar pedagogıkalyq ýnıversıtetiniń ǵalymdary.

Qazaqstandyq delegatsııanyń basshysy Qazaq ulttyq qyzdar pedagogıkalyq ýnıversıtetiniń rektory, professor Gaýhar Aldambergenova atalǵan túrkitildes halyqtar sımpozıýmynyń jyl saıyn atalyp ótetinin aıtty.

2018 jyly atalǵan shara Qazaq ulttyq qyzdar pedagogıkalyq ýnıversıtetinde ótip, onda til, ádebıet, ekonomıka jáne áleýmettik máseleler qozǵalǵan. Bıylǵy jylǵy sımpozıýmda da túrkitildes halyqtarǵa ortaq máseleler talqylanatyn bolady.

«Ǵylym salasyndaǵy tájirıbe almasýdy qamtamasyz etý, jańa ǵylymı zertteýlerdi bastaý, mádenıet jáne álem ádebıeti shekaralaryn keńeıtý, ǵylym men bilim salasyndaǵy túrkitanýshy ǵalymdardyń kezdesýi -Sımpozıýmnyń negizgi maqsaty bolyp tabylady», - dedi qazaqstandyq delegatsııanyń ókili, Qyzdar pedagogıkalyq ýnıversıtetiniń qoǵammen baılanys jónindegi bóliminiń basshysy Jandar Asan.

Shara barysynda pedagogıka, til, ádebıet, tarıh, mádenıet, óner, halyqaralyq qatynastar, ekonomıka, fılosofııa, áleýmettaný, genderlik damý, sondaı-aq jaratylystaný ǵylymdary salasynda jáne túrki álemimen baılanysty jańa birlesken jobalar úshin múmkindikterdi iske asyrý máseleleri kóterildi.

Іs-shara «Ǵalamdyq quzyretti fılologtardy daıyndaýdaǵy halyqaralyq tájirıbe», «Rýhanı jańǵyrý: ádebıet arqyly ulttyq biliktilikti arttyrý», «Ǵalamdyq bilim berý júıesi: áleýmettik jáne gýmanıtarlyq pánderde jańa oqytý ádisteri», «Latyn grafıkasy: tarıh, teorııa jáne oqytý ádisteri», «Túrki qoǵamy: Qazirgi zamanǵy oqý úrdisindegi ulttyq jáne halyqaralyq damý úrdisteri» jáne «Túrki tildes elderde genderlik bilim berýdiń ózekti máseleleri» sııaqty kóptegen taqyryptar boıynsha ótedi.

Aıta keteıik, Túrki álemin zertteý jónindegi halyqaralyq sımpozıým alǵash ret 2014 jyldyń 18-21 naýryzynda Túrik «Ómer Halısdemır» ýnıversıtetinde Túrik «Nııde Ómer Halısdemır» ýnıversıteti, Qazaq ulttyq qyzdar pedagogıkalyq ýnıversıteti, M.Akmýlla atyndaǵy Bashqurt memlekettik pedagogıkalyq ýnıversıtetteriniń bastamasymen ótti.

Shara aıasynda atalǵan joǵarǵy oqý oryndary stýdentteriniń qatysýymen «Túbimiz bir Túrikpiz» atty festıval júıeli túrde ótkizilip turady.