Bakýde Qazaqstannyń Respýblıka kúni toılandy
Іs-sharaǵa Qazaqstannyń Ázerbaıjandaǵy Elshisi Álim Baıel, Ázerbaıjannyń Energetıka mınıstri, Qazaqstan-Ázerbaıjan saýda-ekonomıkalyq yntymaqtastyq jónindegi úkimetaralyq komıssııasynyń teń tóraǵasy Parvız Shahbazov, Ázerbaıjan parlamentiniń depýtattary men memlekettik organ ókilderi, dıplomatııalyq ókildikter men halyqaralyq uıymdardyń basshylary, dıplomattar, mádenıet qaıratkerleri men qoǵam belsendileri, isker toptar men buqaralyq aqparat quraldarynyń ókilderi, sondaı-aq Ázerbaıjanda oqyp, jumys isteıtin qazaqstandyqtar qatysty.
Qabyldaýdyń resmı bóliminde Qazaqstan men Ázerbaıjannyń memlekettik ánurany shyrqaldy, Elshi Álim Baıel men mınıstr Parvız Shahbazov quttyqtaý sóz sóıledi.
Álim Baıel óz sózinde sońǵy bir jylda eki el prezıdenti arasyndaǵy senim dıalogynyń arqasynda Qazaqstan-Ázerbaıjan yntymaqtastyǵynyń damý qarqyny jedeldeı túskenin atap ótti.
Elshi Ázerbaıjan men Qazaqstandy túrki biregeıligi biriktiretinin jáne eki el aımaqta beıbitshilik pen kelisim ornaýy úshin birlesip jumys istep jatqanyn atap ótti.
Sondaı-aq dıplomat «Ortalyq dáliz» (TMTM), Kaspıı teńiziniń túbimen talshyqty-optıkalyq baılanys jelisin tartý, Qazaqstan munaıyn Ázerbaıjan arqyly tasymaldaý sııaqty iri jobalardy júzege asyrý barysy týraly aıtty.
Parvız Shahbazov óz sózinde joǵary deńgeıdegi saıası qarym-qatynas ekonomıkalyq áriptestikti keńeıtýge yqpal etetinin atap ótti. Mınıstr baýyrlas Qazaqstan halqyna tabys, gúldený jáne beıbitshilik tiledi.
Іs-shara barysynda Álim Baıel QR Prezıdenti Qasym-Jomart Toqaevtyń atynan Ázerbaıjan qaıratkerlerine memlekettik nagrada men qurmet gramotalaryn saltanatty túrde tabys etti.
QR Prezıdentiniń Jarlyǵymen Qazaqstan men Ázerbaıjan halyqtary arasyndaǵy dostyq pen yntymaqtastyqty nyǵaıtýǵa sińirgen eńbegi úshin II dárejeli «Dostyq» ordenimen Ázerbaıjan Respýblıkasy Prezıdentiniń syrtqy saıasat máseleleri jónindegi kómekshisi Hıkmet Gadjıev jáne belgili Ázerbaıjan prozashysy, pýblıtsıst, stsenarıst jáne aýdarmashy Narıman Abdýlrahmanly marapattaldy.
Qazaqstan men Ázerbaıjan arasyndaǵy baýyrlastyq qatynasty ilgeriletýge qosqan eleýli úlesi, ekijaqty strategııalyq yntymaqtastyqty nyǵaıtý jónindegi kúsh-jigeri úshin Ázerbaıjan Energetıka mınıstri Parvız Shahbazov pen Ázerbaıjan halyqaralyq qatynastardy taldaý ortalyǵynyń basqarma tóraǵasy Farıd Shafıev QR Prezıdentiniń qurmet gramotasymen marapattaldy.
Resmı qabyldaý aıasynda qonaqtarǵa QR Mádenıet jáne aqparat mınıstrligi, QR Ortalyq memlekettik murajaıy jáne Qazaqstannyń Ázerbaıjandaǵy Elshiligi uıymdastyrǵan etnografııalyq kórme usynyldy.
Shara qonaqtary qazaq halqynyń dástúrli mádenıetiniń sanalýandyǵyn kórsetetin kóne turmys zattarymen, kıim-keshek, at ábzelderi, kilem, kıiz jáne basqa da ulttyq buıymdarmen tanysty.