Bakýde Qazaqstan jáne Ázerbaıjan prezıdentteriniń róli talqylandy

BAKÝ. QazAqparat - QR Prezıdenti Keńsesiniń bastyǵy Mahmud Qasymbekov Ázerbaıjan Prezıdenti Ákimshiliginiń basshysy Rámiz Mehtıevpen kezdesti, dep habarlaıdy «QazAqparat» HAA-nyń Ázerbaıjandaǵy menshikti tilshisi.

Kezdesýde taraptar prezıdentter - Nursultan Nazarbaevtyń, Geıdar Álıev jáne Ilham Álıevtiń baýyrlas elder arasyndaǵy dostyq qarym-qatynastaryn ornatýdaǵy rólin atap kórsetti. R. Mehtıev Qazaqstan Prezıdenti egemendi Qazaqstannyń qalyptasýynda basty ról atqarǵan tanymal saıasatkerlerdiń biri ekenin aıtty.

M. Qasymbekov Nursultan Nazarbaevtyń Ilham Álıevke joldaǵan sálemin jetkize otyryp, Qazaqstan Prezıdenti men Ázerbaıjannyń Jalpyulttyq lıderi negizin qalaǵan dostyq nyǵaıyp kele jatqanyn jetkizdi.

Budan tys, R. Mehtıev Qazaqstan delegatsııasy múshelerin Ázerbaıjannyń memlekettik nagradasy - «Tərəqqi» («Órkenıet») medalimen marapattady. Medal Ázerbaıjan Prezıdentiniń ókimimen tabys etiledi.
   

Óz kezeginde, M. Qasymbekov R. Mehtıevke Ázerbaıjannyń Jalpyulttyq lıderi Geıdar Álıev jaıyndaǵy «Eline jol ashqan» kitabyn tabys etti. Kitap qazaq tiline aýdarylyp, mamyr aıynyń aıaǵynda Astanada jaryq kórgen bolatyn. Onyń estelik nusqalarynyń biri Prezıdent Ilham Álıevke jiberilgen.