Bakýde Qazaq ulttyq horeografııa akademııasynyń gala-kontserti boldy

BAKÝ. QazAqparat - Bakýdegi Ázerbaıjan memlekettik akademııalyq opera jáne balet teatrynda Astananyń 20 jyldyǵyna oraı Qazaq ulttyq horeografııa akademııasynyń gala-kontserti boldy, dep habarlaıdy «QazAqparat» HAA-nyń Ázerbaıjandaǵy tilshisi.

Shara Qazaqstan Respýblıkasynyń Ázerbaıjandaǵy Elshiligi men Ázerbaıjan mádenıet jáne týrızm mınıstriniń qoldaýymen uıymdastyryldy.

Horeografııa akademııasy tárbıelenýshileriniń ónerin tamashalaýǵa Ázerbaıjanda akkredıttelgen dıplomatııalyq mıssııalardyń ókilderi, tanymal mádenıet jáne óner qaıratkerleri, Baký horeografııa akademııasynyń oqytýshylary men tárbıelenýshileri, sondaı-aq baletsúıer qaýym jınaldy.

Qazaqstannyń Ázerbaıjandaǵy Elshisi Beıbit Isabaev Qazaq ulttyq horeografııa akademııasy tolyq kópdeńgeıli tsıklde kásibı horeografııalyq bilim beretin Ortalyq Azııadaǵy alǵashqy joǵary oqý orny ekenin tilge tıek etip, Ázerbaıjan, Frantsııa, Reseı, Qytaı, Japonııa jáne basqa elderdiń aldyńǵy qatarly horeografııa oqý oryndarymen yntymaqtastyq jasaıtynyn aıtty.

Óz kezeginde Ázerbaıjan mádenıet jáne týrızm mınıstri Sevda Mamedalıeva eki eldi ortaq túrkilik tamyrlar, mádenıet, dástúrler jáne rýhanı mura baılanystyratynyn jetkizdi. Elder arasyndaǵy tarıhı tamyrlarǵa negizdelgen qarym-qatynastar túrli salalarda, sonyń ishinde mádenıet jáne óner salasynda da qarqynmen damyp keledi.
 

Gala-kontsertte qazaqstandyq jáne sheteldik baletmeısterlerdiń oryndaýynda Akademııa repertýaryndaǵy úzdik nómirler, klassıkalyq, qazaqsha, neoqazaqsha (jańa qazaqsha) baletter qoıyldy.

«Osy sharaǵa óte muqııat daıyndaldyq. Balalarda sahnaǵa shyǵar aldynda biraz tolqý baıqaldy, degenmen olar ózderin ustap, kásibı deńgeıde óner kórsete bildi», - deıdi akademııanyń kásibı oryndaýshylyq bilim berý mektep-kolledjiniń basshysy Svetlana Kokshınova.

Kórermender Akademııanyń ónerli órenderiniń sheberligine tamsanyp, ár nómirden soń qoshemet bildirip otyrdy.