Bakýde qazaq-ázerbaıjan dostyǵyna arnalǵan mádenı-aǵartýshylyq kesh ótti

BAKÝ. QazAqparat - Bakýdegi aǵaıyndy Novrýzovtar atyndaǵy №36 mektepte «Olımpıadalyq mádenı-bilim berý baǵdarlamasy» aıasynda qazaq-ázerbaıjan dostyǵyna arnalǵan is-shara ótti, dep habarlaıdy QazAqparat tilshisi Qazaqstannyń Ázerbaıjandaǵy Elshiliginiń baspasóz qyzmetine silteme jasap.

Uıymdastyrýshylar merekeni Ázerbaıjan men Qazaqstannyń memlekettik ánurandarymen, sondaı-aq Ázerbaıjannyń táýelsizdigi men aýmaqtyq tutastyǵy úshin qaza tapqandardy bir mınýt únsizdikpen eske alý rásimimen bastady.

Sharanyń negizgi bóliginde qazaq halqynyń ulttyq dástúri – Tusaýkeser rásimi ótkizildi. Odan keıin stýdentter sadaq atý saıysyna qatysty.
Mádenı-aǵartýshylyq keshte qazaq jáne ázerbaıjan án-bıleri oryndaldy. Sharaǵa Aqtaý qalasynan №36 mekteptiń «Shuǵyla» bı toby, «Qos perne» dombyrashylar ansambliniń ónerpazdary, sondaı-aq mektep muǵalimderi keldi.
Mektep foıesinde uıymdastyrylǵan arnaıy kórmege balalardyń Qazaqstan týraly salǵan sýretteri qoıylyp, keshke shyǵarmashylyq kórik qosty. Al mektep aýlasyna jınalǵan kıiz úı kóshpeli túrkilerdiń turmys-tirshiligi atmosferasyn týdyrdy. Osynyń bári qonaqtar men qatysýshylar boıynda dostyq pen baýyrmaldyq sezim uıalatyp, olardy merekelik kóńil-kúıge bóledi.

Kontserttik baǵdarlamanyń sońynda sóz alǵan Ázerbaıjan Mıllı Medjlısiniń depýtaty Ýlvııa Gamzaeva Qazaqstannyń Ázerbaıjan úshin orny erekshe ekenin, onyń basty sebepteriniń biri 20 ǵasyrdyń qıyn 20-30-shy jyldaryndaǵy qýǵyn-súrgin kezinde qazaq jeri myńdaǵan ázerbaıjandarǵa pana bolyp, ekinshi otanyna aınalǵanyn atap ótti.
Keshti uıymdastyrýshylar Ázerbaıjan men Qazaqstan dostyǵyn dáripteıtin shara ulttyq tamyry, qundylyqtary ortaq, mádenıeti, tili men dini bir-birimen tyǵyz baılanysty eki halyqtyń birligi turǵysynan joǵary baǵalanyp otyrǵanyn, búgingi jas urpaqqa ortaq túrkilik sana men osy birlikke adaldyq qajet ekenin atap ótti.
Sharaǵa Ázerbaıjan Parlamentiniń depýtattary, Ázerbaıjan Respýblıkasy Olımpıada komıtetiniń, Ǵylym jáne bilim mınıstrliginiń, atqarýshy bıliktiń ókilderi, gazet-jýrnaldar redaktorlary, Qazaqstan Respýblıkasy Elshiliginiń dıplomattary, sondaı-aq Aqtaý qalasyndaǵy Nazarbaev Zııatkerlik mektebiniń muǵalimderi men oqýshylary qatysty.