Bakýde qatty jel eki júk kóligin aýdaryp tastady

ASTANA. QazAqparat - Bakýde qatty jel eki júk kóligin aýdaryp tastady.

Oqıǵalardyń biri Baký-Alıat jolynyń 19-shy shaqyrymynda Garadagskıı aýdanynyń aýmaǵynda oryn alǵan, dep habarlady Day.Az ANS TV-ge silteme jasap.

Bolgarııa azamaty Nıkolaı Georgıevıch Kýrkov júrgizgen júk kóligi Alıat kentine bara jatqanda ony jel aýdaryp jibergen. Japa shekkender bolmady. Alaıda oqıǵa kólik keptelisiniń oryn alýyna sebep boldy. Sonymen qatar jolǵa janar-jaǵar maı tógilgen. Órttiń aldyn alý úshin oqıǵa ornyna órt sóndirýshiler kelgeni beınerolıkten málim bolyp otyr.

Osy jolda taǵy bir tirkemesi bar júk kóligi aýdaryldy. Ol Bakýǵa bara jatqan. Kýágerlerdiń sózine qaraǵanda, japa shekkender joq. Alaıda júk kóligine edáýir zııan keldi.