Bakýde «Alash Orda» týraly ázerbaıjan tilindegi kitaptyń tusaýy kesildi
Memleket basshysy Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamalyq maqalasy aıasynda Qazaqstan elshiligi ázerbaıjan tilindegi kitaptar serııasyn jaryqqa shyǵaryp jatyr. Ol kitaptar qazaq memlekettiliginiń qurylýyna, tarıhı tulǵalar men ǵylym ókilderine arnalǵan. Sol kitaptardyń biri - «Alash Orda» tarıhyna arnalyp otyr.
Qazaqstan Prezıdentiniń «Uly dalanyń jeti qyry» maqalasyndaǵy bastamalaryn júzege asyrý maqsatynda ázerbaıjandyq oqyrmanǵa osy eldiń aqyny ári dramatýrgy Gýseın Djavıdtiń qazaq tilindegi jınaǵy jol tartty. Kitapty Ázerbaıjan Respýblıkasynyń Ulttyq akademııasy jáne QR elshiliginiń kómegimen Ál-Farabı atyndaǵy QazUÝ daıyndaǵan.
Kitaptyń tanystyrylý sharasyna Ál-Farabı atyndaǵy QazUÝ rektory Ǵalymqaıyr Mutanov, ÁR Prezıdent Ákimshiliginiń ókilderi, ÁR Ulttyq ǵylym akademııasynyń vıtse-prezıdenti Isa Gabıbeılı, ÁR Ulttyq ǵylym akademııasynyń jetekshi quramy, ázerbaıjandyq JOO-lardyń stýdentteri men professorlyq-tálimgerlik quramy qatysty.
Ázerbaıjandaǵy Qazaqstannyń elshisi Beıbit Isabaev jınalǵan jurtshylyqqa kitaptyń mazmuny týraly aıta kele «Alash» partııasynyń óz nıettesterin tarta bilgenin, zııalylar qazaq halqynyń múddesi úshin qaterge qarsy turǵanyn, Alash zııalylarynyń ulttyq memlekettilikti qalyptastyrýda zor eńbek sińirgenin atap ótti. Alashtyń baǵdarlamalyq maqsattary - erkin ári táýelsiz memleket qurý týrasyndaǵy qazaq halqynyń baıaǵydan bergi armanymen ushtasqany aıqyn.
«Elbasy N.Á.Nazarbaev «Uly dalanyń jeti qyry» atty maqalasynda «Uly dalanyń uly esimderi» atty entsıklopedııalyq parktiń qurylýyna bastamashylyq etken bolatyn. Onda kórnekti tarıhı tulǵalardyń qurmetine ashyq aspan astynda músindik eskertkishter qoıylyp, olardyń jetistikteri jazylatyn bolady. Alash orda zııalylary da osy saıabaqta laıyqty oryn alatynyna senimdimin», - dedi B.Isabaev.
Qazaqstanda 2017 jyly Alash partııasynyń qurylýynyń 100 jyldyǵy men Ázerbaıjan Demokratııalyq Respýblıkasynyń qurylýyna 100 jyl tolýyn salystyra kele Qazaqstan elshisi osy tarıhı kezeńder eki eldiń memlekettiliginiń tarıhynda erekshe oryn alatynyn aıtyp ótti.
Sonymen birge, elshi Gýseına Djavıdtiń kitaby jaıly sóz qozǵap, atalmysh kitap latyn qarpinde - qazaq tilinde shyqqan alǵashqy kitaptardyń biri ekenin atap ótti.
Ál-farabı atyndaǵy QazUÝ rektory Ǵalymqaıyr Mutanov 2018 jyl - búkil túrki álemi úshin aıryqsha bolǵanyn aıtyp ótti.
«Bizdi kóp qundylyq biriktirip otyr. Eń aldymen, ol qundylyqtar - tarıh, mádenıet, til. Týystas halyqtardyń tarıhyn jáne mádenıetin zertteı otyryp, biz ortaq tarıhymyz ben mádenıetimizdi qalpyna keltirip, halqymyzben tanystyrý joldaryn tabamyz. Sonymen qatar, qazaq jáne ázerbaıjan halqynyń mádenıeti men tarıhyn bólek qarastyrý durys bolmas edi. Qazirgi ýaqytta Qazaqstan Prezıdentiniń bastamasymen elimizde «Rýhanı jańǵyrý» baǵdarlamasy qabyldandy. Onyń basty maqsaty - ulttyń rýhanı jańarýy. Osy baǵdarlamany damytý baǵytynda Qazaqstan Prezıdenti jaqynda «Uly dalanyń jeti qyry» atty maqalasyn jarııalady. Bul baǵdarlamalyq qujattar bizdiń halqymyzdyń rýhanı jańǵyrýyn kózdeıdi. Rýhanı qaıta jańarýsyz, táýelsiz jáne qazirgi zamanǵy memleket qurý ońaı emes. Adamzat órkenıetindegi bizdiń halyqtarymyzdyń tarıhy, róli men orny týraly zertteýler júrgizýdiń naqty mindetteri qoıyldy. Qazaq halqynyń tarıhyn búkil túrki áleminiń tarıhynan bólip jarýǵa bolmaıdy. Biz elimizdi búkil túrki áleminiń bir bóligi dep sanaımyz», - dedi Ǵ.Mutanov.
Qonaqtar osyndaı mańyzdy jobalardy júzege asyrý - eki eldiń halyqtarynyń jaqyndasýyn jáne baýyrlas elder arasyndaǵy mádenı-gýmanıtarlyq yntymaqtastyqty odan ári nyǵaıtýǵa yqpal etetinin atap ótti.
Budan basqa Ál-Farabı atyndaǵy QazUÝ men Ázerbaıjannyń Ulttyq ǵylym akademııasy arasynda yntymaqtastyq týraly memorandýmǵa qol qoıyldy.
Avtor: Bekbaý Taımanov