Bakýde «Alash arystary» kitabynyń tusaýkeseri ótti

BAKÝ. QazAqparat - Memleket basshysy «Uly dalanyń jeti qyry» atty baǵdarlamalyq maqalasynda túrki halyqtarynyń rýhanı jańǵyrý qajettigin alǵa tartty. Ol túrki halyqtarynyń jarqyn esimderiniń murasyn saqtap, bolashaq urpaqqa qaldyrý úshin Túrki keńesine «Túrki áleminiń 100 aıtýly tulǵasy» jobasyn júzege asyrýdy usyndy. 

Qazaqstan Respýblıkasy Prezıdentiniń bastamasyn qoldaý maqsatynda Ázirbaıjannyń astanasy Baký qalasynda «Alash arystyry» kitaby men Gýseın Djavıdtiń qazaq jáne ázirbaıjan tilderindegi óleńder jınaǵynyń tusaýkeseri ótti. Іs-sharany uıymdastyrýshylar - Ázirbaıjandaǵy Qazaqstan Respýblıkasynyń Elshiligi, ál-Farabı atyndaǵy QazUÝ jáne Ázirbaıjan Ulttyq ǵylym akademııasy.

QazUÝ rektory, akademık Ǵalym Mutanov óz sózinde Memleket basshysynyń «Uly dalanyń jeti qyry» atty maqalasynda túrki halyqtarynyń adamzat órkenıetiniń damýyna qosqan úlesine úlken nazar aýdarylǵanyn atap ótti. Gýseın Djavıd - álem ádebıetiniń damýyna zor úles qosqan tamasha sóz sheberi jáne Ázirbaıjannyń kórnekti aqyny. Ol shyǵarmalarynda búkil túrki áleminiń rýhanı tutastyǵyn jyrlaǵan.

«Alash-Orda» tarıhyn zertteı otyryp, ázirbaıjandyqtar qazaqtardyń tarıhyn tereńirek túsine alady, al Gýseın Djavıdtiń shyǵarmashylyǵymen tanysý qazaq jáne ázirbaıjan halyqtarynyń rýhanı jaqyndasýyna sózsiz úles qosatynyna senimdimin», - dep atap ótti óz sózinde Ǵalym Mutanov.

Kezdesý sońynda QazUÝ rektory Ǵalym Mutanov pen Ázirbaıjan Ulttyq ǵylym akademııasynyń vıtse-prezıdenti Isa Habıbeılı yntymaqtastyq týraly memorandýmǵa qol qoıdy. Taraptar 1926 jyly ótken Búkilodaqtyq túrki kongresiniń materıaldaryn qaıta basyp shyǵarýǵa, sondaı-aq túrki halyqtarynyń tarıhy, lıngvıstıkasy, mádenıeti men ádebıeti týraly ǵylymı jobalardy birlesip júzege asyrýǵa kelisti.

Ázirbaıjannyń «Dede Qorqyt» atty Ulttyq qorynyń prezıdenti Eldar Ismaılov QazUÝ rektoryn ǵylym men bilim salasyndaǵy jetistikteriniń moıyndalǵanynyń belgisi retinde jáne de dostas elder arasyndaǵy mádenı-gýmanıtarlyq baılanystardy nyǵaıtýǵa qosqan zor úlesi úshin «Qızıl yürák» («Altyn júrek») ordenimen marapattady.

Joǵary marapatty usyna otyryp, ol Ǵalym Mutanovtyń belgili ǵalym jáne joǵary bilim salasynda uıymdastyrýshy retinde tanymal ekenin, sondaı-aq onyń basshylyǵymen Qazaqstannyń jetekshi ýnıversıteti - ál-Farabı atyndaǵy QazUÝ túrki álemindegi eń úzdik ýnıversıtet ataǵyna ıe bolyp, halyqaralyq deńgeıde eleýli jetistikterge qol jetkizýde ekendigin atap ótti.