Bakýde Túrki áleminiń mádenı murasy týraly konventsııa daıyndalmaq

<p>BAKÝ. KAZINFORM - Túrki mádenıeti jáne mura qorynyń (Qor) shtab-páterinde tuńǵysh ret quryltaıshy elderdiń Syrtqy ister jáne Mádenıet mınıstrlikteriniń ókilderi, mádenı mura salasyndaǵy sarapshylar, sondaı-aq joba jetekshileri men uıymnyń zertteý mamandary deńgeıinde kezdesýler ótti, dep habarlaıdy &laquo;KAZINFORM&raquo; agenttiginiń menshikti tilshisi.</p>

Kezdesýler sheńberinde saraptamalyq toptardyń qatysýymen keńester ótti, «Túrki áleminiń mádenı murasy týraly konventsııany» daıyndaý boıynsha usynystar usynyldy, túrki memleketteri basshylarynyń túrki yntymaqtastyǵy uıymdarynyń aldyna qoıǵan jáne «TURKTIME» baǵdarlamalyq qujatynda belgilengen mindetteri talqylandy.

Jınalysty ashqan Qor prezıdenti Aqtoty Raıymqulova «Túrki áleminiń keleshegi – 2040» aıasynda «Túrki áleminiń mádenı murasy týraly Konventsııany» ázirleý boıynsha qorǵa júktelgen jumys bastalǵanyn atap ótti.

Foto: Túrki memleketteri uıymy

Otyrystyń kún tártibine «Túrki áleminiń mádenı murasy týraly konventsııany» daıyndaý, qordyń aldaǵy eki jylǵa arnalǵan josparyn qaraý jáne uıym janynan Túrki áleminiń sáýlet restavratorlary men tarıhshylarynyń Konsýltatıvtik keńesin qurý sekildi máseleler engizildi.

Qatysýshylarǵa «Túrki áleminiń mádenı murasy týraly konventsııa» jobasy usynyldy. Memlekettik organdardyń ókilderi, saraptamalyq toptar men qor qyzmetkerleri qujatty jetildirý jáne ózara qyzyǵýshylyq týdyratyn máseleler boıynsha pikir almasty.

Foto: Túrki memleketteri uıymy

Keńeste, sondaı-aq, qorǵa múshe elderdiń ótinimderi men túrki áleminiń baı murasyn ilgeriletý, qorǵaý jáne qalpyna keltirý jónindegi jobalardy qamtıtyn joba jetekshileriniń usynystary negizinde qordyń egjeı-tegjeıli eki jyldyq qyzmet jospary (Action Plan) qaraldy.

Eki kún ishinde kezdesýler ózara pikir almasýmen jáne usynystardy engizýmen qatar júrdi. Aıta ketý kerek, qor mundaı úılestirý keńesterin budan ári de kelisilgen sheshimder qabyldaý úshin ótkizedi.

Foto: Túrki memleketteri uıymy

Eske salaıyq, atalmysh qor 2012 jylǵy 23 tamyzda Bishkekte Túrki memleketteri uıymy prezıdentter keńesiniń otyrysynda quryldy. Qordyń maqsaty túrki mádenıeti men murasyn saqtaýǵa, zerdeleýge jáne nasıhattaýǵa baǵyttalǵan baǵdarlamalar men jobalardy qoldaý jáne qarjylandyrý bolyp tabylady.