Baký-Tbılısı-Djeıhan arqyly munaı tasymaldaýdyń 2 baǵyty talqylanýda

NUR-SULTAN. QazAqparat – Qazaqstan Ázerbaıjan arqyly Túrkııa men Grýzııaǵa munaı jetkizý joldaryn talqylap jatyr. Bul týraly «QazMunaıGaz» UK AQ basqarmasy tóraǵasynyń ekonomıka jáne qarjy jónindegi orynbasary Dáýren Qarabaev aıtty, dep habarlaıdy QazAqparat tilshisi.

«Samuryq-Qazyna» qorynyń Telegram kanalynda ótken brıfıng barysynda ol Qazaqstan munaı jetkizýdiń balamaly baǵyttaryn belsendi túrde izdestirip jatqanyn atap ótti.

Onyń sózine qaraǵanda, qazir ázerbaıjandyq seriktestermen kelissózder júrgizilýde. Onda Baký-Tbılısı-Djeıhan munaı qubyrlary arqyly Túrkııaǵa jáne Baký-Sýpsa arqyly Grýzııaǵa jetkizýdiń eki baǵyty talqylanyp jatyr.

Aıta keteıik, 22 tamyzda Kaspıı qubyr jelisiniń eki kesheni tehnıkalyq aqaýlarǵa baılanysty jumys istemeı turǵany habarlanǵan edi.

Este bolsa, osy jyldyń 6 shildesinde Novorossııskiniń Prımorsk aýdandyq soty qujattyq zań buzýshylyqtar úshin «KTK-R» kompanııasynyń qyzmetin 30 táýlikke toqtatqan bolatyn.

11 shildede Krasnodar óńirlik soty Kaspıı qubyr konsortsıýmy jumysyn toqtata turý jónindegi sheshimdi ózgertip, aıyppulǵa almastyrdy.