Baký men Vashıngton Ázerbaıjan-Armenııa qarym-qatynasyn qalypqa keltirý máselesin talqylady

<p>ASTANA. KAZINFORM &ndash; AQSh Memlekettik hatshysy Entonı Blınken Ázerbaıjan prezıdenti Ilham Álıevpen telefon arqyly sóılesti, dep habarlaıdy Ázerbaıjan prezıdentiniń baspasóz qyzmeti.</p>

Taraptar telefon arqyly Armenııamen shıelenisti beıbit jolmen sheshý jáne Bakýde COP29 konferentsııasyn uıymdastyrý máselelerin talqylady. Entonı Blınken 30 tamyzda memlekettik shekarany delımıtatsııalaý komıssııalarynyń birlesken qyzmeti týraly erejege qol qoıýdy oń baǵalaı otyryp, AQSh aımaqta turaqty beıbitshilikke qol jetkizý úshin kúsh salýdy jalǵastyratynyna sendirdi.

«Ázerbaıjannyń kúsh-jigeriniń arqasynda bizdiń aımaqta ádildik pen halyqaralyq quqyqqa negizdelgen jańa shyndyqtar men statýs-kvo paıda boldy. Bizdiń el ári Armenııa men Ázerbaıjan arasyndaǵy bitimgershilik kelisimniń bastamashysy», - dedi Ilham Álıev.

Ilham Álıev sondaı-aq oǵan qol qoıý úshin Erevan Bakýge aýmaqtyq talaptardan bas tartýy kerek ekenin málimdedi. Áńgimelesý barysynda sondaı-aq Ázerbaıjanda COP29 konferentsııasyn ótkizý máselesi talqylandy. Blınken AQSh-tyń is-sharanyń sátti daıyndalýy men ótkizilýine qoldaý bildirip, AQSh pen Ázerbaıjan komandalary men delegatsııalarynyń belsendi yntymaqtastyǵyn atap ótti.

Armenııa premer-mınıstri Nıkol Pashınıan Erevan men Baký beıbit kelisim mátinin 80 paıyz keliskenin baıandady. Premer-mınıstrdiń aıtýynsha, Ázerbaıjanǵa jaqyn arada kelisilgen erejelerge qol qoıý usynyldy.

Buǵan deıin Qazaqstan Prezıdenti Qasym-Jomart Toqaev Qazaqstan tarapynyń Ázerbaıjan men Armenııa arasyndaǵy beıbitshilik shartyn jasasý jónindegi kelissózder úshin Almaty alańyn usynýdy jalǵastyrýǵa daıyn ekenin rastady.