Qazaqstan Baký-Tbılısı-Djeıhan baǵytyndaǵy munaı tranzıtin 1,5 mln tonnaǵa jetkizbek

<p>BAKÝ. KAZINFORM — Qazaqstannyń Energetıka mınıstri Almasadam Sátqalıev seısenbide óziniń áriptesi-Ázerbaıjannyń Energetıka mınıstri Parvız Shahbazovpen kezdesý ótkizdi.</p>

Kezdesý Qazaqstan men Ázerbaıjan arasyndaǵy saýda-ekonomıkalyq yntymaqtastyq jónindegi birlesken úkimetaralyq komıssııanyń 20-shy otyrysynyń qorytyndysy boıynsha ótti.

Kezdesý barysynda taraptar elderdiń energetıka, qazaqstandyq munaı tranzıti, jańartylatyn energııa kózderiniń aýqymdy jobalaryn iske asyrý salasyndaǵy yntymaqtastyǵyna qatysty birqatar máselelerdi talqylady.

Ózderińiz biletindeı, 2022 jyldyń qarasha aıynda «QazMunaıGaz» jáne SOCAR kompanııalary arasynda Aqtaý-Baký-Tbılısı-Djeıhan baǵyty boıynsha munaı tranzıti týraly kelisimge qol qoıyldy.

2023 jyly Aqtaý portynan jóneltilgen munaı Baký-Tbılısı-Djeıhan baǵytynda 1 057 myń tonna boldy.

2024 jylǵa qazaqstandyq munaıdy BTD arqyly jylyna 1,5 mln tonna kóleminde jetkizý josparlanǵan.

«Bizdiń ulttyq kompanııalarymyzdyń aldyna Qazaqstanda óndiristiń ósýin eskere otyryp, munaı jetkizý kólemin ulǵaıtý mindeti qoıyldy. Osyǵan baılanysty biz qazaqstandyq munaıdy jetkizý kólemin ulǵaıtýdy josparlap otyrmyz», — dep atap ótti kezdesý barysynda A.Sátqalıev.

Energetıka mınıstrliginiń basshylary Kaspıı teńiziniń túbine tereń sý kabelin tóseý arqyly Kavkaz óńiri men Ortalyq Azııanyń energııa júıelerin qosýǵa baǵyttalǵan jobany iske asyrý boıynsha aldaǵy jumystardy talqylady.