Baký Frantsııa ІІM basshysynan keshirim suraýdy talap etti

<p>ASTANA. KAZINFORM &ndash; Ázerbaıjan Respýblıkasynyń Syrtqy ister mınıstrligi Frantsııanyń Іshki ister mınıstri Jerar Darmanenniń Jańa Kaledonııa isterine aralasý týraly aıyptaýlaryn joqqa shyǵardy. Sońǵy kúnderi atalǵan aımaqta jappaı narazylyqtar basylmaı tur.</p>

«Biz Frantsııanyń Іshki ister mınıstri Jerar Darmanenniń Ázerbaıjanǵa qarsy kezekti málimdemesin jáne Ázerbaıjan men jańa Kaledonııanyń Táýelsizdik qozǵalysynyń jetekshileri arasyndaǵy 2024 jyldyń 16 mamyrynda «Frantsııa-2» telearnasyna bergen suhbatynda jasalǵan boljamdy baılanystardy tolyǵymen joqqa shyǵaramyz», - delingen Ázerbaıjan Respýblıkasy Syrtqy ister mınıstrliginiń baspasóz qyzmetiniń basshysy Aıhan Gadjızadeniń málimdemesinde.

Mınıstrlik sonymen qatar Frantsııany Ázerbaıjanǵa qatysty basqa da negizsiz kiná taǵýdy toqtatýǵa shaqyrdy.

Keıinirek Aıhan Gadjızade jýrnalısterdiń saýalyna jaýap bere otyryp, Ázerbaıjandy dıktator el retinde retinde tanyǵan Frantsýz mınıstriniń sózderine túsinikteme berdi.

«Frantsııanyń Ázerbaıjanǵa qarsy jasaǵan mundaı málimdemeleri aqylǵa qonbaıdy jáne biz oǵan úzildi-kesildi qarsylyq tanytyp jatyrmyz», - dedi A. Gadjızade.

Onyń aıtýynsha, Ázerbaıjanda negizgi quqyqtar men bostandyqtar tolyq qamtamasyz etilgen. Elde ártúrli ult pen din ustaǵan adamdar jaıly jáne qaýipsiz jaǵdaıda birge ómir súredi.

«Frantsýz tarapy bul málimdeme úshin keshirim suraýy kerek. Áıtpese, bul «Ázerbaıjan-Frantsýz» qatynasyna odan ári keri áser etedi», - delingen baspasóz hatshysynyń málimdemesinde.

Eske sala ketsek, Frantsııa Jańa Kaledonııadaǵy tártipsizdikterge baılanysty tótenshe jaǵdaı jarııalaǵan edi.

Frantsııa 15 mamyr sársenbi kúni tańǵy 5-ten bastap jańa Kaledonııada tótenshe jaǵdaı jarııalady, bul bılikke jınalystarǵa tyıym salý jáne adamdardyń aralda júrýine tyıym salý úshin qosymsha ókilettikter berdi.

10 jyl boıy jańa Kaledonııada turatyn kaledondyq emes Frantsııa azamattaryna jergilikti saılaýda daýys berýge múmkindik beretin frantsýz Parlamenti qabyldaǵan zań jobasy tártipsizdikterdiń basty sebebi boldy.

Jańa Kaledonııa — Tynyq muhıtynyń ońtústik-batysynda, Aýstralııadan shyǵysqa qaraı shamamen 1500 km jerde ornalasqan araldar toby. Araldar 1853 jyldan beri frantsýzdardyń baqylaýynda. 1946 jyly Jańa Kaledonııa sheteldegi aýmaq mártebesin aldy.