Baqtııar Máken: Jastardy jumysqa ornalastyrý sharalaryn jalǵastyramyz
«Jalpy Qazaqstandaǵy halyqtyń 20 paıyzyn jastar quraıdy. Kóptegen jas azamattarǵa pandemııanyń áseri erekshe tıgenin jasyra almaımyz. Bul jyl álemge ǵana emes, Qazaqstanǵa da ońaıǵa tıgen joq. Halyqaralyq eńbek naryǵynyń baıandamasyna sáıkes pandemııa bastalǵaly beri álemdegi árbir altynshy jas azamat óziniń jumysyn toqtatýǵa májbúr bolǵan nemese jumystan shyǵyp qalǵan. Jastardyń kóbi qyzmet kórsetý men saýda, tehnıkalyq retteý salasynda eńbek etedi. Ózderińiz biletindeı, Memleket basshysynyń tapsyrmasymen Úkimet daǵdarysqa qarsy sharalardy engizdi. Daǵdarysqa qarsy sharalar aıasynda Jumyspen qamtý baǵdarlamasy bizge kóp kómektesti. Biz bul jumysty jalǵastyramyz», - dedi Baqtııar Máken onlaın rejımde «Bolashaq» qaýymdastyǵynyń uıymdastyrýymen ótken «Jastar jáne ınnovatsııalar» forýmynda.
Onyń aıtýynsha, pandemııanyń saldarynan ekonomıka zardap shekkendikten, al bul óz kezeginde jastarǵa keri áserin tıgizetindikten eń aldymen olardyń jumyssyz qalmaýyna basa mán berý kerek.
«Tehnıkalyq retteý, saýda men qyzmet kórsetý salasynda jumysyn jalǵastyryp jatqandardyń ózi bıyl tabysynyń 42 paıyzynan aıyryldy. Sol úshin jastarǵa barynsha qoldaý kórsetý kerek», - dedi ol.
Eske sala ketsek, atalmysh onlaın jıynda Aqparat jáne qoǵamdyq damý vıtse-mınıstri Ashat Oralov Qazaqstanda jastardy qoldaýdyń 2021-2025 jyldarǵa arnalǵan keshendi jospary tanystyrylatynyn málim etken bolatyn.