Baqtııar Máken: Prezıdent joldaýy –áleýmettik bastamalardy oryndaýdyń jańa kezeńi
«Prezıdent joldaýy – Elbasy baǵdaryn ári qaraı júzege asyrýdy qamtamasyz etetin iri áleýmettik jáne saıası bastamalardy oryndaýdyń jańa kezeńi. Joldaýda Memleket basshysy el damýyndaǵy eń ózekti máselelerdi aıtyp, olardy sheshýdiń naqty joldaryn kórsetti, qoǵam damýynyń strategııalyq baǵdary men baǵyttaryn anyqtady. Qasym-Jomart Toqaev Úkimet kóńil bólýi tıis bes negizgi salany atady: zamanaýı ári tıimdi memleket, azamattardyń quqyǵy men qaýipsizdigin qamtamasyz etý, ekonomıkanyń ınklıýzıvti damýy, áleýmettik jańǵyrtýdyń jańa kezeńi jáne áleýmetti óńirler», - dedi B. Máken elordada Dostyq úıinde ótken Memleket basshysynyń Joldaýyn talqylaý jónindegi dóńgelek ústelde.
Sonymen birge, ol memleket pen halyq arasyndaǵy senimdi qatynas tıimdi memlekettiń negizi ekenin atap ótti jáne jaqynda ótken Ulttyq qoǵamdyq senim keńesiniń otyrysyna pikir bildirdi.
«Eń bastysy – halyq únine qulaq asatyn memleket tujyrymdamasy. Ondaǵy negizgi strategııalyq element – halyq tarapynan bılikke senim ornatýǵa basa mán berilip otyr. Sonymen birge, jaqynda Ulttyq qoǵamdyq senim keńesi qurylyp, alǵashqy otyrysyn ótkizdi. Ulttyq keńestiń tıimdiligi – azamattyq qoǵamnyń jalpymemlekettik ózekti máseleler jóninde óz pikirin aıta alatyn dıalogtyq alańy bolmaq. Azamattardyń quqyǵy men qaýipsizdigin qamtamasyz etý – salaýatty qoǵam qurýdyń mańyzdy sharty. Osy maqsatta sot pen quqyq qorǵaý júıelerine túbegeıli reformalar júrgiziledi», - dedi spıker.
Ákim orynbasary elimizde ınklıýzıvti qoǵam qurýdyń mańyzdylyǵyna da toqtaldy.
«Áleýmettik máseleler bóliminde bilim berý, ana men bala ınstıtýtyn qoldaý, sapaly medıtsınalyq qyzmet qoljetimdiligi, mádenıet qyzmetkerlerin qoldaý, ınklıýzıvti qoǵam qurý jóninde aıtyldy. Múmkindigi shekteýli jandardy tolyqqandy qoǵam ómirine tartý – ınklıýzıvti qoǵam qurýdyń mańyzdy mindeti. Bul maqsatta aldaǵy úsh jylda 58 mlrd teńge bólinedi», - dep atap ótti Baqtııar Máken.
Eske sala ketsek, 2019 jyly 2 qyrkúıekte Prezıdent Qasym-Jomart Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn jarııalady