Baqtııar Qryqpyshev «Qazaqmys korporatsııas» JShS-niń Bas dırektory bolyp taǵaıyndaldy
Basqarma tóraǵasy Edýard Ogaı endi B. Qryqpyshevtyń ákimshilik jáne fýnktsıonaldyq basshysy bolady. Kompanııanyń baspasóz qyzmetiniń habarlaýynsha, buǵan deıin Qazaqmys korporatsııasynyń Taý-ken óńdeýshi kesheniniń Bas dırektory qyzmetin atqaryp kelgen Baqtııar Qryqpyshev 1 jeltoqsannan bastap «Qazaqmys korporatsııasy» JShS Bas dırektory bolyp taǵaıyndalǵan. Bul laýazym óndiristik bólimshelerdi basqarýdy jáne basshylardyń jaýapkershilikterin arttyrýǵa baǵyttalǵan jańadan bekitilgen uıymdyq qurylymǵa sáıkes engizilip otyr. Onyń negizgi mindetteri - óndiristiń tehnıkalyq, ekologııalyq jáne resýrstardy únemdeý standarttary men olardy iske asyrýdyń mehanızmderin, sondaı-aq kompanııadaǵy eńbekti qorǵaý jáne qaýipsizdik tehnıkasyna baqylaý jasaýdyń kúsheıtilýin qarastyratyn óndiristik qyzmet strategııasyn aıqyndaý bolyp tabylady.
Qaraǵandy oblysynyń Qarsaqpaı kentinde metallýrgterdiń otbasynda dúnıege kelgen Baqtııar Qryqpyshev 1996 jyly Jezqazǵandaǵy Taý-ken tehnologııalyq ınstıtýtyn támamdap, eńbek jolyn Qazaqmys korporatsııasynyń Soltústik Jezqazǵan kenishinde bastaǵan edi. Ol 17 jyl ishinde kompanııada mansaptyq ósýdiń barlyq satysynan ótti. Basqarýshylyq jáne óndiristik jetistikteri úshin osy ýaqytqa deıin «Qazaqstan Konstıtýtsııasyna 10 jyl» mereıtoılyq medalimen jáne ІІІ dárejeli «Eńbek dańqy» tósbelgisimen marapattalǵan.