Baqtııar Artaev Golovkınniń búgingi jekpe-jegine boljam jasady
«Saýl «Kanelo» Alvarespen bolǵan arasyndaǵy sońǵy jekpe-jekti Gennadıı Golovkınniń tarıhyndaǵy eń qyzyqty kezdesý dep baǵalasa bolady. Tanymal ári naǵyz babyndaǵy boksshymen birinshi ret kezdesti. Osy sózdi aıtyp jatqan kezde kóp jankúıerler menimen kelisetin shyǵar. Bul jekpe-jek teń aıaqtaldy. Desek te bul bokstyń qyzyq jaǵy - ol qarjy, bıznes. Meniń jeke pikirime toqtalsam, ekinshi kezdesýdiń qyzyq bolýy úshin jasalǵan qadam bolýy múmkin. Bul jekpe-jektiń aınalasyndaǵy barlyq máseleler ekinshi jekpe-jekti qyzdyrý aldyndaǵy kishigirim shoý bolǵan shyǵar degen oıdamyn. Birinshi kezdesýdi barlyǵymyz kórdik, rasynda da teń aıaqtalatyndaı deńgeıde ótti», - dep toqtaldy Baqtııar Artaev.
Olımpıada chempıonynyń paıymynsha, Golovkınniń Alvarespen bolýy múmkin ekinshi kezdesýi qaýipti bolýy yqtımal. Qazirgi kezde «Kanelonyń» órisi keńeıip, tájirıbesi molaıyp kele jatyr.
Sonymen qatar ol Genanyń brıtandyq boksshy Bıllı Djo Sonderspen jekpe-jekke shyqqany tıimdirek ekenin aıta kele: «Óıtkeni Sonders te tanymal boksshy, ekinshi jaǵynan ol únemi Golovınge shaqyrtý berip jatyr. Sondyqtan tańdaý Sonderske túsetin shyǵar dep oılaımyn», - dedi ol.
Aıta keteıik, búgin Gennadıı Golovkın (37-0-1, 33 KO) men Vanes Martırosıannyń (36-3-1, 21 KO) jekpe-jegi ótedi.
«Jeke pikirimdi aıtatyn bolsam, Gena jekpe-jek bastalysymen alǵa qaraı júredi. Vanes Martırosıan ekinshi nómirli boksshy bolyp oınap, qashqalaqtap júredi. Bul kezdesýdiń nátıjesi 5-6 raýndtyń arasynda sheshilip qalýy múmkin», - dedi Baqtııar Artaev.
Buǵan deıin habarlanǵandaı, qazaqstandyq bylǵary qolǵap sheberi Gennadıı men dopıng daýyna ilikken meksıkalyq Saýl «Kanelo» Alvares (49-1-2, 34 KO) arasyndaǵy bıylǵy mamyrǵa belgilengen revanshtyń bolmaıtyndyǵy belgili boldy.