Baqsaı kanalyna 26 jastaǵy jigit batyp ketti
«2 tamyzda saǵat 15:05 shamasynda tótenshe jaǵdaılar departamentiniń baılanys beketine Atyraý oblysy Mahambet aýdany Tańdaı selosynda 1996 jylǵy azamattyń sýǵa batyp ketkeni týraly habarlama tústi. Oqıǵa ornyna jedel qutqarý jasaǵy jiberildi. Saǵat 19:10-da jergilikti turǵyndardyń kómegimen azamattyń máıiti tabylyp, sýdan shyǵaryldy. Marqumnyń Baqsaı kanalyndaǵy sýǵa túsýge ruqsat etilmegen jerde shomylǵany anyqtaldy», - dep málim etti Atyraý oblysy TJD qoǵammen baılanys toby.
Jergilikti quzyrly organ dereginshe, izdestirý-qutqarý jumystaryna 5 súńgýir, 1 qaıyq, 2 arnaıy tehnıka, aýdandyq polıtsııa bóliminiń 3 qyzmetkeri men 2 jergilikti turǵyn jumyldyrylǵan.
Eske sala keteıik, keshe taǵy da Atyraý oblysynda osyndaı qaıǵyly jaǵdaı oryn alǵan edi. Mahambet aýdanynyń ákimi Rınat Janǵylysh Jaıyq ózeniniń jabdyqtalmaǵan tusynda shomylyp, sýǵa batyp ketti. Denesi bir táýlikten soń tabyldy.