Baqytjan Bazarbek: Sý qoımalarynyń taǵdyryn mafııa sheship otyr
Depýtat Sergeev sý qoımasynyń janyndaǵy ken óndirý jobasy halyqqa qaýip tóndirýi múmkin ekenin aıtady.
«Mundaǵy qaýip - sý kólemi jobalyq qýatynan 80 paıyz asqan, sý deńgeıi 4 metrden joǵary kóterilgen sý qoımasynyń janynda qaýipti kenish bar. Ondaǵy paıdaly qazbany jarylǵysh zat arqyly ıgerý kózdelip otyr. «Darhan Aıdosuly» deıtin jer qoınaýyn ıgerýshi JShS-niń 2017 jyly paıdaly qazba alý týraly 25 jyldyq kelisimshartty qalaı jasaǵany túsiniksiz. Jer jaldaý merzimi 5 jyl bolǵanymen, keıin 2042 jylǵa deıin uzartylǵan. 2015 jylǵy qaýly boıynsha Esil ózeniniń sý qorǵaý aımaǵy jaǵadan 1000 metr aralyqty qamtıdy. Sý qorǵaý aımaǵynyń aýmaǵynda paıdaly qazbany barlap, ıgerýge, jarylǵysh arqyly qoparýǵa tyıym salynǵan. Al sý sharýashylyǵy mekemesi men ózge de memlekettik organdar kenishtegi jarylǵysh zat arqyly jer qoınaýyn qoparý sharalarynyń Sergeev sý qoımasyna qalaı áser etkenin teksermegen. Kenishti barlaý, paıdaly qazbany alý jobasynyń aıasynda ekologııalyq saraptama men qorshaǵan ortaǵa áserin baǵalaý, qoǵamdyq tyńdaý sharalary qalaı ótkeni belgisiz», — deıdi depýtat.
Sondaı-aq, ol Almaty qalasynyń irgesindegi Aqsaı bógetiniń jaǵdaıyna da toqtaldy.
«Almaty oblysynyń memlekettik sáýlet-qurylys baqylaý organy Aqsaı bógetiniń 22 mıllıard teńge turatyn qurylysyn toqtatqan. Oǵan tapsyrys berýshi «Qazseldenqorǵaý» mekemesiniń bastapqy jobaǵa ózgeris engizip, biraq ony memlekettik saraptamaǵa bermeýi sebep bolǵan. Kesirinen 30 myń adamnyń ómirin saqtaýǵa tıis nysan tapsyrys berýshiniń salǵyrttyǵy saldarynan tıisti saraptama men ruqsatsyz salynyp ketti. Osylaısha bógettiń sapasy kúmándi kúıde qalyp otyr. Qazir qylmystyq is júrip jatyr. Sot qalalyq tótenshe jaǵdaılar departamenti men «Qazseldenqorǵaý» mekemesiniń laýazymdy tulǵalarynyń áreketine quqyqtyq baǵa beredi dep úmittenemin», — deıdi Baqytjan Bazarbek.
Aıtýynsha, Almaty oblysyndaǵy Voroshılov sý qoımasyn senimgerlik basqarýǵa alǵan kásipker úsh jyldan beri nysannyń boıyndaǵy aqaýlardy joımaı otyr.
«Ókinishke qaraı, quqyq qorǵaý organdary sý qoımasynyń ıesi men «Ilıırrıgatsııa» mekemesiniń áreketine quqyqtyq baǵa bergen joq», — dedi ol.
Depýtat «Úshqońyr-ırrıgatsııa» mekemesiniń laýazymdy tulǵalary Almaty oblysynyń Іle jáne Qarasaı aýdandaryndaǵy 5 iri sý qoımasyn Shahvorostov deıtin azamattyń menshigine shyǵaryp bergenin eske saldy.
«Ilıırrıgatsııa», «Talǵar-ırrıgatsııa» mekemelerinde osyǵan uqsas jaǵdaı bar. Bul mekemelerdi mafııa dersiń. Jumystary ashyq emes, eshkim tekserip jatqan joq. Saldarynan sý qoımalary men tospalar, bógesinder qoldan-qolǵa ótip, jyl saıyn aqaýlary qujatpen qattalmaıdy. Bulardyń súıenishi kim? Sý sharýashylyǵynda mafııanyń bolýy kimge tıimdi?» — dep surady Baqytjan Bazarbek.
Depýtat saýalynda kórsetilgen faktiler boıynsha prokýrorlyq tekserý júrgizýdi surady.