BAQ týraly jańa zańda qandaı ózgerister bolady
«Prezıdent Qasym-Jomart Toqaevtyń byltyrǵy 16 naýryzdaǵy Joldaýynda «Táýelsiz ári jaýapkershiligi joǵary buqaralyq aqparat quraldary bolmasa, qoǵamdy odan ári demokratııalandyrý múmkin emestigine senimdimin. Sondyqtan memlekettiń múddesin, qoǵamnyń suranysyn jáne medıasalanyń damý úrdisin eskere otyryp, BAQ týraly zańdy qaıta qaraý kerek» dep mınıstrlik aldyna salalyq zańnamany jetildirý mindetin qoıdy. Sondyqtan qazir dástúrli BAQ-tyń baǵyty kontseptýaldy turǵyda ózgerip jatyr. Jańa medıa túsinigi qalyptasty. Medıazańnamany qaıta qaraý jumysy júrip jatyr», - dedi D. Qydyráli mınıstrliktiń keńeıtilgen alqa otyrysynda
Onyń aıtýynsha, balalarǵa qatysty kıberbýllıngti retteýde zańnamalyq túzetýler engizildi.
Halyqaralyq tájirıbelerdi eskere otyryp, mass-medıa týraly zań jurtshylyq talqylaýyna shyǵaryldy.
Sondaı-aq, onlaın platformalar men ınternet jarnama qyzmetin retteıtin jańa zań jobasy ázirlenýde.
«Zań jobasy aıasynda jýrnalısterdiń mártebesin kóterý, memlekettik aqparattyq saıasatty qarjylandyrý tetikterin reformalaý, ózin-ózi retteý ınstıtýttaryn damytý, teleradıo habarlaryn taratý salasyndaǵy trendterdi ózgertý josparlanǵan. Aqparatqa qol jetkizý máseleleri týraly zańǵa túzetýler ázirlendi. Usynylǵan ózgerister azamattardyń aqparatqa qol jetkizý quqyǵyn zańsyz shekteıtin memlekettik organdardyń jaýapkershiligin kúsheıtedi. Aqparattyq doktrına talqylaýdan ótti, sondaı-aq aqparat salasyn damytýdyń 2023-2027 jyldarǵa arnalǵan tujyrymdamasyn daıyndaýǵa kiristik», - dedi Aqparat mınıstri.
Aıta keteıik, BAQ týraly zań jobasy 27 qańtarǵa deıin qoǵam talqylaýynda bolady.