BAQ týraly jańa zań jobasynda jýrnalısterdiń mártebesin kóterý qarastyrylǵan - mınıstr

ASTANA. QazAqparat – QR Aqparat jáne qoǵamdyq damý mınıstri Darhan Qydyráli BAQ týraly jańa zań jobasynda jýrnalısterdiń mártebesin kóterý máselesi qamtylatynyn aıtty, dep habarlaıdy QazAqparat tilshisi.

Búgin Parlament Májilisindegi baspasóz máslıhatynda tilshiler mınıstrden BAQ týraly jańa zań jobasyn ázirleý men jýrnalısterdiń mártebesi týraly suraq qoıdy.

«Bul massmedıa týraly zań jobasyna erekshe mán berip otyrmyz. Osy oraıda jumys toptary halyqaralyq uıymdarmen, sarapshylar keńinen talqylaý júrgizedi. Jýyq arada ony portalǵa shyǵaramyz», - dedi D. Qydyráli.

Bul turǵyda jýrnalısterge mártebe berý máselesin, aqparat alý múmkindigin jeńildetý, sondaı-aq tilshilerdiń jumystaryna qatysty kóptegen artyqshylyq qarastyrylyp otyr.

«Sondyqtan massmedıa týraly zań jobasy jýrnalısterdiń quqyǵyn qorǵaýǵa baǵyttalǵan. Halyqaralyq uıymdarmen pikir almasyp jatyrmyz, úzdik tájirıbelerdi nazarǵa alamyz. Atap aıtqanda, sapaly zań bolady dep oılaımyn», - dedi mınıstr.

Budan buryn habarlanǵandaı, bıyl qazan aıynda Aqparat mınıstri BAQ týraly jańa zań jobasynda birshama jańashyldyq bar ekenin aıtqan edi.