BAQ týraly zańnyń tıimdiligin aldaǵy ýaqytta aıtyp beremin - Dáýren Abaev
«Bizdiń mınıstrlik úshin 2017 jyl aıtarlyqtaı jemisti boldy dep aıtýǵa bolady. Menińshe, biz bir jyldyń ishinde kóptegen jumystardy atqaryp úlgerdik, alaıda áli de bolsa atqarylar sharýa jeterlik. Sondyqtan, 2018 jylǵa asa yjdaǵattylyqpen (optımızmmen) qadam basqaly otyrmyz. Bir jyldyń ishinde ne istep úlgerdik? Eń aldymen, álbette, aqparat jáne kommýnıkatsııalarǵa baılanysty ózgerister men tolyqtyrýlar engizý týraly zań jobasyn atap ótkim keledi. Bul - 288 ózgeristen turatyn úlken zań jobasy. Ózińiz biletindeı, óte qyzý talqylanyp, búgingi tańda qabyldandy. Osy zań jobasyna qatysty alda óte úlken jumystar kútip tur», - dedi mınıstr «Habar» arnasyndaǵy «Ashyq dıalog» baǵdarlamasynda suhbatynda.
Mınıstr óz sózinde buqaralyq aqparat quraldary ókilderiniń «jańa ózgerister BAQ jumysyna keri áserin tıgizbeı me?» degen narazylyǵynan habardar ekenin jetkizdi.
«Men senimdi túrde keri áseri tımeıtinin aıta ketkim keledi. Biz bul zańdy tutynýshylardyń da, jýrnalıstik ortanyń da oıymen kelise otyryp ázirledik. Onyń qalaısha sátti jumys isteıtini týraly suraqqa men kelesi jyldyń (2018 jyl - avt.) alǵashqy alty aıynda jaýap beremin degen oıdamyn», - deıdi Dáýren Abaev.
Dáýren Abaev sonymen qatar, Aqparat jáne kommýnıkatsııalar mınıstrliginiń taǵy bir baǵyndyrǵan belesi - «Tsıfrlyq Qazaqstan» memlekettik baǵdarlamasyna erekshe atsalysýy dep biletinin aıtty.
«Baǵdarlama Memleket basshysymen maquldanyp, qabyldandy. Ol Qazaqstandaǵy árbir azamatqa qatysty sharýa. Ol árbir qazaqstandyqtyń ómirine jáne ekonomıkanyń barlyq salasyna, barlyq ınfraqurylymǵa jaǵymdy áserin tıgizedi. Halyq burynǵydan sapaly ınternetke, memleket tarapynan kórsetiletin qyzmetke qol jetkizedi», - deıdi ol.
Mınıstr óziniń paıymyn qarapaıym mysalmen shegeleı tústi.
«Biz Halyqqa qyzmet kórsetý ortalyqtaryn el ómirine engize bastaǵan ýaqytta, ıaǵnı 15 jyl buryn qandaı syn aıtylǵanyn bilesizder. Al oǵan deıin adamdar qarapaıym jeke kýálikti alýdyń ózi qanshalyqty ońaı emes ekenin, qanshama kezek kútip tur kerektigin baıqamaı ómir súre berdi. Biraq, HQKO-lar jumysyn bastaǵannan keıin halyq olardyń jumysyn birshama synǵa alǵanymen, bir aptadan keıin ótinim bergen qujatyn alý jolyna úırene bastady. Al qazir halyq ortalyqqa eki márte kelgisi kelmeıdi. ıAǵnı, ótinim úshin jáne alyp ketý úshin eki márte kelýge qulyqsyz. Adamdar úıinde otyryp-aq qajetti qaǵaz-qujattaryn toltyryp, jeke málimetterin joldaý ádisimen bir aptadan keıin «Qazposhta» arqyly qujatyn qolyna alǵysy keledi. Biz osy jolmen kele jatyrmyz. Demek, biz qyzmet kórsetý sapasyn arttyryp, qazaqstandyqtardyń ýaqytyn únemdep otyrmyz», - deıdi Dáýren Abaev.
Mınıstr úshinshiden, mınıstrlik erekshe atsalysqan «Qazaqstannyń 100 jańa esimi» jobasy ekenin aıtyp berdi.
«Biz bul jumysqa atsalysqanymyzdy maqtan tutamyz. Qazaqstan úshin jańa esimderdi, maqtan tutar adamdardy ashyp bere alǵanymyzǵa sengimiz keledi. Meniń oıymsha, bul joba óziniń jalǵasyn tabady», - dep túıdi mınıstr.