BAQ týraly zań qoǵamdyq jáne saraptamalyq talqylaý negizinde qaıta qaralady – mınıstr

NUR-SULTAN. QazAqparat – Buqaralyq aqparat quraldarynyń rólin, mártebesin jáne jaýapkershiligin nyǵaıtý boıynsha birqatar mindet tur. Bul týraly Úkimet otyrysynda QR Aqparat jáne qoǵamdyq damý mınıstri Asqar Ýmarov málim etti, dep habarlaıdy QazAqparat tilshisi.

«Memleket basshysy «Jańa Qazaqstan: Jańarý jáne jańǵyrý joly» atty Joldaýynda buqaralyq aqparat quraldarynyń básekege qabilettiligin arttyrý jáne azamattyq qoǵam ınstıtýttarynyń rólin nyǵaıtý boıynsha birqatar mindetter qoıdy. Aqparat salasy boıynsha toqtalsaq, Memleket basshysy atap ótkendeı, ashyq aqparattyq keńistik pen básekege qabiletti otandyq buqaralyq aqparat quraldaryn qurýǵa erekshe nazar aýdarý qajet. Búgingi tańda mınıstrlik aldynda buqaralyq aqparat quraldarynyń rólin, mártebesin jáne jaýapkershiligin nyǵaıtý boıynsha birqatar mindet tur», - dedi A.Ýmarov.

Osyǵan baılanysty, mınıstrliktiń jumysy, eń aldymen, kelesi mindetterdi sheshýge baǵyttalatyn bolady:

Birinshiden, qoǵamnyń suranysy men memleket múddesin eskere otyryp, buqaralyq aqparat quraldary týraly zańy qaıta qaralatyn bolady. Bul protsess keń qoǵamdyq jáne saraptamalyq talqylaý negizinde júzege asyrylatynyn atap ótý mańyzdy. Osylaısha, jýrnalıstik qoǵamdastyqtyń aǵymdaǵy zańnamaǵa qatysty barlyq ózekti máseleleri eskeriletin bolady.

Ekinshiden, azamattyq baqylaýdy júzege asyratyn «tórtinshi bılik» retinde áreket etetin buqaralyq aqparat quraldary úshin ashyq básekelestik orta damıtyn bolady.

«Úshinshiden, memlekettik aqparattyq jumys boıynsha jańa tásilder ázirlenetin bolady», - dedi mınıstr.