BAQ ókilderi Arystaǵy jaǵdaımen arnaıy baryp tanysty

ARYS. QazAqparat - Arysta oryn alǵan tótenshe jaǵdaıǵa baılanysty qalanyń búgingi jaı-kúıimen tanysý jáne ózge óńirlerdegi halyqtyń alańdaýly saýaldaryna jaýap berý maqsatynda press-týr uıymdastyryldy, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Arystyń qazirgi jaǵdaıyn óz kózimen kórýge 20-dan astam respýblıkalyq jáne óńirlik BAQ-nyń ókilderi men áleýmettik jeli belsendileri arnaıy keldi.

Jarylystan qıraǵan nysandar men zardap shekken áleýmettik núktelerdi aralatý barysynda jýrnalıstermen birge Túrkistan oblysy polıtsııa departamenti ákimshilik basqarmasynyń basshysy, polıtsııa polkovnıgi Almashan Tastanbekov jáne Túrkistan oblysy Tótenshe jaǵdaılar departamentiniń bastyǵy azamattyq qorǵaý polkovnıgi Júnisov Nurǵalı Syrlybaıuly birge júrip, qysqasha málimet berdi.

Nurǵalı Syrlybaıulynyń málimetinshe, qazirgi tańda 3566 adam, evakýatsııalansa, 1946 adam evakýatsııalyq bólimshelerinde ornalastyrylǵan. «Qalaǵa ázirge kirý múmkindigi joq, biz tek jýrnalıster kózin jetkizý úshin nysanǵa kirgizýge ruqsat aldyq. Sebebi, bul jerde qaýipti jaǵdaı basylmaǵan, saperler jumys jasaýda», dep atap ótti Túrkistan oblysy Tótenshe jaǵdaılar departamentiniń bastyǵy.

Sondaı-aq Túrkistan oblysy polıtsııa departamenti ákimshilik basqarmasynyń basshysy Almashan Tastanbekov qazirgi tańda 1000-ǵa jýyq patrýl qyzmeti jumys istep jatqanyn jáne qala boıynsha 6 blokpost qoıylǵanyn málimdedi.

Atap óteıik, TJ saldaryn joıýǵa jeke quramnan 36 adam jáne 40 tehnıka jumyldyryldy. Atalǵan oqıǵa boıynsha monıtorıng júrgizilip, is baqylaýǵa alynǵan. Degenmen, Arys qalasynyń 7600 turǵyn úıiniń áınekteri synǵan, 80-85% úılerdiń shatyryna zaqym kelgen.

Qala aýmaǵyn túni boıy Ulttyq ulannyń 580 jaýyngeri men 345 polıtsııa qyzmetkeri kúzetti. Olar qaraqshylyq faktiniń aldyn alyp, 3 jergilikti turǵyndy ustady.

Arystyń búgingi jaı-kúıin óz kózimen kórgen jýrnalıster foto-vıdeoǵa túsirip, qalyń buqaraǵa jetkizýde obektıvti aqparat beretinderin jetkizdi.