BAQ mańyzdy qoǵamdyq ınstıtýt retinde moıyndalýy kerek – Tamara Kaleeva
«10 úkimettik emes uıym óz tilekterin bildirý úshin osy sharaǵa kelip otyr. BAQ-pen jumys boıynsha bizde úlken tájirıbe bar. Onyń ishinde jaǵymsyz tájirıbe de bar. Biz Úkimetke tujyrymdamalyq jáne egjeı-tegjeıli usynystarymyzdy jetkizgimiz keledi. Atap aıtqanda, jańa zańda, ol qalaı atalsa da, sóz bostandyǵynyń kepildikteri naqty belgilenýi kerek. Ázirge bul uǵym bizde tek Konstıtýtsııada ǵana kórsetilgen. Al qoldanystaǵy BAQ týraly zańda eki ret qana kezdesedi. Sóz bostandyǵy boıynsha kepildikter naqty bolýy kerek jáne olar naqty normalar qoldaýy kerek»,-dedi Tamara Kaleeva elordada ótip jatqan buqaralyq medıany zańnamalyq retteý týraly konferentsııa aldynda.
Ol BAQ týraly zańnamanyń halyqaralyq standarttarǵa saı bolýy mańyzdy ekenin jetkizdi.
«Biz BAQ týraly zańnyń halyqaralyq standarttarǵa sáıkes kelýin qalaımyz. Qazir bul kórsetkish 50%-dyń aınalasynda deýge bolady. Esepke alý jáne baqylaý máselesine kelsek, biz jýrnalısterdiń quqyǵyn qorǵaǵymyz keledi. Biz BAQ- tyń memleketke qajetti mańyzdy qoǵamdyq ınstıtýt retinde moıyndalǵanyn qalaımyz», - dedi halyqaralyq qordyń prezıdenti.
Ol osy boıynsha salany retteýshi memlekettik organǵa naqty usynystar joldanatynyn aıtty.
«BAQ-ty tirkeý, BAQ-qa arnalǵan memlekettik tapsyrysty bólý, memlekettik aqparattyq saıasatqa qatysty naqty usynystar da bar. Іs-shara qorytyndysy boıynsha usynystar jobasy jasalady», - dep túıindedi Tamara Kaleeva.