BAQ-qa ákimshilik júktemelerdi azaıtý maqsatynda birqatar jeńildikter jasalady - Dáýren Abaev
«Kommýnıkatsııalyq tehnologııalar jedel damyǵan qazirgi ýaqytta onymen baılanysty salalar da kúrdeli ózgeristerge túsýde. Basqasyn aıtpaǵanda, aqparat degen uǵymnyń ózi de ózgerip, aýqymy keńeıip keledi. Kún ótken saıyn aqparatty taratýdyń jańa arnalary men quraldary paıda bolýda. Sonymen birge, memleket pen BAQ, mass-medıa men azamattardyń arasyndaǵy ózara baılanystyń mańyzdylyǵy da artty. Osy aspektiler bul sala sýbektilerin odan ári damytý úshin zańnamany beıimdeýdiń qajettiligin kórsetip otyr. Osyǵan saı 2016-2021 jyldarǵa arnalǵan tujyrymdamalyq jáne Úkimettiń 2017 jylǵa zań shyǵarý jospary boıynsha jańa zań jobasy ázirlendi. Aqparat jáne kommýnıkatsııalar máselelerin qamtıtyn bul jobada 12 zań men 4 kodekske ózgertýler men tolyqtyrýlar engizý kózdelgen»,- dedi mınıstr «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasy boıynsha baıandamasynda.
Osy oraıda D. Abaev zań jobasynda qarastyrylǵan basty baǵyttarǵa keńirek toqtalyp óttti.
«Birinshiden, buqaralyq aqparat quraldarynyń damýy úshin sapaly zańnamalyq bazany odan ary qalyptastyrý qarastyrylyp otyr. Sonyń ishinde ákimshilik júktemeler men shekteý sharalaryn azaıtý maqsatynda jeńildikter jasalady. Atap aıtqanda, azdaǵan quqyqbuzýshylyqtar úshin gazettiń tırajyn tárkileý nemese BAQ-tyń qyzmetin toqtatý sııaqty jazalardy alyp tastaý kózdelýde. Aqparat quraldaryn shyndyqqa saı kelmeıtin aqparatty taratýǵa qatysty jaýapkershilikten bosatatyn sebepter qatary da ulǵaıady. Bul ózgeris memlekettik organdardaǵy BAQ-pen baılanys jónindegi ókiletti tulǵaǵa jaýapkershilik júkteıdi»,-dep túsindirdi vedomstvo basshysy.
Taǵy bir másele, buqaralyq aqparat quraldarynda azamattardyń sýretin qandaı jaǵdaıda ruqsat suramaı jarııalaýǵa bolatyny aıqyndaldy.
«Mysaly, kópshilik jappaı qatysatyn mádenı, sporttyq jáne basqa da sharalarda jurt aldynda sóz sóıleýge qatysty. Sonymen qatar qazaqstandyq kontentti odan ary qaraı qoldaý maqsatynda memlekettik mekemeler men uıymdarda tek otandyq telearnalardy kórsetý josparlanýda»,- dedi mınıstr.
Atap aıtqanda, qazaqstandyqtardyń buqaralyq aqparat quraldarymen ózara qarym-qatynasyn retteý sharalary qarastyrylady. Bul rette zorlyq-zombylyqtan zardap shekken balanyń jeke basyn anyqtaıtyn kez kelgen aqparatty, onyń sýretin aqparat quraldarynda jarııalaýǵa shekteý usynylyp otyr.
«Sonymen qatar kúmándi aqparatty jarııalaýda týyndaıtyn daýlardy sotqa deıin retteý tártibin ózgertý josparlanýda. Bul máselede taraptardyń teń múmkindikterin qamtamasyz etý mańyzdy. Buǵan qosa, zań jobasynda múmkindigi shekteýli azamattardyń múddesi de eskeriledi. Memlekettik tildegi jarnamalardyń teń bólinýine, sondaı-aq balalarǵa arnalǵan dinı jáne aǵartý telebaǵdarlamalary sııaqty uǵymdardy naqtylaý boıynsha sheshimder usynylýda»,- dedi Dáýren Abaev.