BAQ damýy jýrnalısterdiń jeke jaýapkershiligin arttyrýdy talap etedi - sarapshy

ALMATY. QazAqparat- Qazaqstan Prezıdenti Qasym-Jomart Toqaevtyń búgingi Qazaqstan halqyna joldaýynda osy ýaqytqa deıin qoǵam tarapynan belsendi talqylanǵan jáne sarapshylardyń oı eleginen ótkizilgen saıası reformalardyń bir top baǵyttary qamtyldy. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýtynyń halyqaralyq qatynastar bóliminiń basshysy Ásel Nazarbetova aıtty, dep habarlaıdy QazAqparat tilshisi.

Onyń aıtýynsha, Memleket basshysy usynǵan bastamalar, olardy júzege asyrý mehanızmderi el azamattarynyń kóńilinen shyqty.

Sebebi bul sheshimder halyqtyń búgingi tańdaǵy talaptaryna, qoǵamnyń damý deńgeıi men suranystaryna jaýap bere alady.

«Aıta keterligi, Parlamenttiń rólin arttyrý, saılaý júıesin jetildirý, partııalardy damytý múmkindikteri, quqyq qorǵaý júıesin kúsheıtý, ákimshilik-aýmaqtyq qurylymǵa ózgerister engizýmen qatar, buqaralyq aqparat quraldary men azamattyq qoǵamnyń rólin arttyrýǵa baılanysty birqatar tapsyrmalar berildi. Sonyń ishinde BAQ týraly jańa zań qabyldaý. Qazirgi qoldanystaǵy 1999 jylǵy zańǵa 2017 jyly aýqymdy ózgerister engizilgen bolatyn»,- deıdi ol.

Ásel Nazarbetovanyń sózinshe, búginde birqatar memleketterde buqaralyq aqparat quraldary azamattardy saıası tárbıeleý, olardy ishki jáne halyqaralyq mańyzdy oqıǵalar týraly habardar etý, olarda adekvatty saıası minez-qulyq pen kózqarasty qalyptastyrý fýnktsııalaryn sátti júzege asyrýda.

«Alaıda BAQ-ty teris maqsatta, ıaǵnı artyqshylyqty áleýmettik toptardyń saıası ústemdigin nyǵaıtý úshin paıdalanatyn jaǵdaılary joqqa shyǵarylmaıdy. Qazaqstandaǵy medıa-saıasattyń júzege asyrylýy BAQ-tyń memleket tarapynan shekten tys baqylaýynda bolǵan kezde «etatıstik BAQ saıasaty» retinde sıpattalady. Sonymen qatar, Qazaqstanda iri aqparattyq resýrstardy ıdeologııalyq jumystyń tıimdi quralyna aınaldyrý maqsatynda olarǵa baqylaýdy kúsheıtýge baǵyttalǵan BAQ saıasaty júrgizilýde. BAQ damýynyń zamanaýı shyndyǵy jýrnalısterdiń jeke jaýapkershiligin arttyrýdy talap etedi, ol týraly Memleket basshysy óz joldaýynda atap ótti»,- deıdi spıker.

QR Prezıdenti janyndaǵy Qazaqstan strategııalyq zertteýler ınstıtýtynyń ókili Eýropa elindegi buqaralyq aqparat quraldarynyń róli men jumysyna toqtaldy.

«Eýropa elderiniń BAQ-taǵy ózin-ózi retteý mehanızmi tájirıbesine qarasaq, AQSh-ta, Ulybrıtanııada jáne Frantsııada baspasózdiń ózin-ózi retteýiniń yqpaldy mehanızmi joq. Frantsııada basylymdardyń jumysynda mańyzdy ról atqaratyn negizgi BAQ jýrnalısteriniń qaýymdastyǵy bar. Bul turǵyda Germanııadaǵy BAQ jumysyna nazar aýdarǵan jón, munda BAQ úkimet nemese partııalar tarapynan baqylanbaıdy, olar táýelsiz jáne olardyń kózqarasy árqashan memlekettiń resmı ustanymymen sáıkes kele bermeıdi. Germanııadaǵy baqylaýshy organnyń fýnktsııalaryn ózin-ózi baqylaý keńesi oryndaıdy. Keńesti gazet-jýrnal shyǵarýshylardyń federaldyq odaqtary, sondaı-aq Germanııa jýrnalıster odaǵy men BAQ qyzmetkerleriniń kásipodaq uıymy qurǵan»,- dedi Ásel Nazarbetova.