Bahtııar Artaev: Golovkın men «Kanelonyń» aıqasy nokaýtsyz aıaqtalady
«Eń qýanyshtysy, eldiń kópten kútken kezdesýi áıteýir bolaıyn dep jatyr. Jyldar boıy kútken aıqasqa shamaly kúnder ǵana qaldy. Sondyqtan, toıdyń bolarynan boladysy qyzyq deıdi ǵoı (kúldi). Óıtkeni, eki myqty shyqqan kezde keı jaǵdaıda qyzyq jekpe-jek bolmaıdy. Máselen, Pakıao men Meıvezerdiń kezdesýin eldiń bári asyǵa kútti ǵoı... Ekeýi shyqqan kezde (Golovkın - Kanelo) úshinshi, tórtinshi nemese besinshi raýndqa deıin bir-birinen seskenip júrýi múmkin. Odan ary qaraı tórtinshi jáne besinshi raýndta ekeýi ashylady. Qyzyqtyń kókesi sol kezde bastalatyn sekildi. Óıtkeni, ekeýi de pancher. Ekeýi de bir-biriniń shamasyn bile turyp, asa saqtyq tanytady. Nokaýt bola qoımaıdy. Bul jerde ekeýi de bylaısha aıtqanda, qudaıy bar jigitter... Aıqas aıaǵyna deıin bolady. Upaı sanymen Gennadıı utatyn sekildi. Biraq, jekpe-jek barysynda Gena Alvaresti bir-eki nogdaýnǵa jiberýi kerek. Óıtkeni men biletin Genanyń kúsh-qýaty myqty. Bir qaýip bar, Gena Kel Brýkpen shyqqandaǵydaı, qolyn túsirip, «ursań ur» degendeı aıqasqa tússe, Alvares paıdalanyp ketýi múmkin. Ondaı qatelikke barmaı, saq bolyp júrý kerek. Upaı sanymen utpasa, nokaýtqa jiberý ońaı bolmaıdy», - dedi Bahtııar Artaev.
Eske salaıyq, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn. Ýaqyt aıyrmashylyǵyna baılanysty Qazaqstanda jekpe-jektiń tikeleı kórsetilimi 17 qyrkúıekte tańerteń bolady.