Baǵynyshty qyzmetkeri jemqorlyqpen ustalǵan 2 aýdan ákimi jumystan ketti

NUR-SULTAN. QazAqparat – Sybaılas jemqorlyqqa qarsy is-qımyl agenttigi basshylardyń baǵynyshty qyzmetkeriniń jemqorlyq áreketi úshin tártiptik jaýapkershiligi týraly zańnamalyq normanyń oryndalýyna monıtorıngti jalǵastyrýda, dep habarlaıdy QazAqparat tilshisi.

«Búgin de baǵynyshtylardyń sybaılas jemqorlyq qylmysy úshin 3 saıası memlekettik qyzmetshi otstavkaǵa ketý týraly ótinish berdi. Atap aıtqanda, Jambyl oblysy Shý aýdanynyń ákimi aýyldyq okrýg ákimine úkim shyqqannan keıin otstavkaǵa berip, óz erkimen qyzmetinen bosatyldy. Sol sekildi BQO Shyńǵyrlaý aýdanynyń ákimi otstavkaǵa ketti. Onyń baǵynyshtysy – aýdandyq bilim bóliminiń basshysy 2019 jyldyń 10 jeltoqsanyna deıin sybaılas jemqorlyq qylmysyn jasaǵan bolatyn», - dedi QR Sybaılas jemqorlyqqa qarsy is-qımyl agenttiginiń parasat departamentiniń dırektory Ǵanıjan Asanuly onlaın baspasóz máslıhatynda.

Eske sala ketsek, buǵan deıin agenttik ókili Qaraǵandy oblysy Sátbaev qalasynyń ákimi qalalyq TKSh, jolaýshylar kóligi jáne avtomobıl joldary bólimi basshysynyń sybaılas jemqorlyq qylmysy úshin otstavkaǵa ótinish bergenin aıtqan edi.

Alaıda, ákimniń otstavkasy qabyldanǵan joq, ol sógis túrinde tártiptik jaýapkershilikke tartylǵan.