Baǵynyshty qyzmetkeri jemqorlyqpen ustalǵan 11 basshy otstavkaǵa ketýi múmkin

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń ákimshilik-quqyqtyq departamentiniń dırektory Aıgúl Bazarbaeva baǵynyshty qyzmetkeri sybaılas jemqorlyq qylmys jasasa, basshysyn da jazalaý tártibi qalaı júzege asyrylyp jatqanyn aıtyp berdi, dep habarlaıdy QazAqparat tilshisi.

Agenttik ókiliniń aıtýynsha, 2019 jyldyń 10 jeltoqsanynan bastap baǵynyshty qyzmetkeri jemqorlyqpen ustalǵan jaǵdaıda basshysy da jeke jaýapkershilikke tartylatyny jaıly talap kúshine engen.

«Bul rette basshyǵa qatysty otstavkany qabyldaý nemese ony tártiptik jaýapkershilikke tartý úshin ustalǵan baǵynyshty qyzmetker tikeleı kimge baǵynatynyn anyqtap, aıqyndap alý kerek. Máselen ortalyq memlekettik organdaǵy mınıstrdiń tikeleı baǵynyshtylary – onyń orynbasarlary, jaýapty hatshysy, apparattardyń basshysy nemese aýmaqtyq bólimshelerdiń basshysy», - dedi Aıgúl Bazarbaeva agenttiktiń onlaın rejımde ótken baspasóz máslıhatynda.

Agenttik ókili óz sózin naqty mysaldarmen keltirdi.

«Máselen Sátpaev qalasy ákimi otstavkaǵa ótinish berdi. Onyń tikeleı qyzmetkeri jemqorlyq jasaǵan. Bul qylmys 10 jeltoqsanda jasalǵanyna qaramastan moraldyq-etıkalyq qaǵıdattardy negizge ala otyryp, Sátpaevtyń ákimi otstavkaǵa ketýdi ótindi. Ázirge otstavka qabyldanǵan joq. Ol tártiptik jaýapkershilikke tartyldy», - dedi ol.

Aıgúl Bazarbaeva, sonymen qatar, Batys Qazaqstan oblysynda da osyndaı jaǵdaı tirkelgenin jetkizdi.

«Qazir Sybaılas jemqorlyqqa qarsy is-qımyl agenttiginiń óndirisinde osy jaǵdaılarǵa qatysty birneshe sotqa deıingi tergeý amaldary júrgizilip, keıbir is sotta da qaralýda. Osy ister boıynsha 11 basshy jaýapkershilikke tartylatyn bolady», - dedi ol.