Mınıstr jeke qujattardyń iri platformalarda ashylýy múmkindigine qatysty túsinik berdi

<p>Qazaqstannyń iri platformalarda memlekettik qyzmetterdi usyný tájirıbesin halyqaralyq uıymdar oń baǵalady. Bul týraly <a href="https://www.youtube.com/watch?v=QlkwhdOFseM&amp;ab_channel=EldarMaratov" target="_blank" rel="noopener">Jibek Joly</a>&nbsp;telearnasynyń &laquo;Ýáde&raquo; baǵdarlamasyna suhbat bergen Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Baǵdarlama barysynda jeke málimetterdi jekemenshik qarjylyq uıymdarǵa (Kaspi.kz, Halyk platformalary) berý qanshalyqty durys bolǵany týraly suraq qoıyldy.

«Máselen, eGov.kz qosymshasyna kirgen kezde «Kaspi.kz platformasyna tsıfrlyq qujattar týraly málimetterdi berýge ruqsat beresiz be?» degen saýal bolady. Siz atalǵan platformada qujattar týraly derekterdiń bolýyna ózińiz ruqsat berseńiz, dál solaı osy ruqsatyńyzdy keri qaıtaryp alýǵa bolady. EGov.kz qosymshasynda osyndaı múmkindikter bar», - dedi B.Mýsın.

Mınıstr Kaspi.kz nemese Halyk platformalarynyń qosymshalaryna qosylǵan kezde «memlekettik qyzmetter» degen batyrma bolatynyn eske saldy.

«Tıisti siltemeni basqan kezde, «eGov.kz-ke osy málimetterdi Kaspi.kz-ke qondyrýǵa ruqsat beremin» degen habarlama alasyz. Osy batyrmany baspasańyz, sizdiń qujattar memlekettik derekqordan basqa platformalarda ashylmaıdy», - dedi vedomstvo basshysy.

Bul turǵyda ol Qazaqstandaǵy osy tájirıbeni halyqaralyq uıymdar zerttep, muny durys baǵyt ekenin rastaǵanyn aıtty.

«Sondyqtan bul tájirıbe halyqaralyq deńgeıde ońtaıly baǵalanyp, basqa da memleketterde iske asyrýǵa bolatynyn usyndy. Reseıde, Ózbekstanda jáne basqa da elderde osyny nusqaýlyq retinde alyp otyr», - dedi Baǵdat Mýsın.