Baǵdat Mýsın óshirilmegen aıyppuldar problemasyn sheshýge ýáde berdi

ASTANA. QazAqparat - Qazirgi ýaqytta qurylyp jatqan aıyppuldar boıynsha etalondyq baza sot oryndaýshylarynyń aqparatyn túzetýge múmkindik beredi. 

Sebebi búginde aıyppuldar tólense de, kóptegen turǵyndarǵa sot oryndaýshylary qaýlyny oryndaý maqsatynda kelip turatyn jaǵdaılar jıi kezdesýde. Bul týraly Feısbýktegi paraqshasynda QR Bas prokýratýrasynyń Quqyqtyq statıstıka jáne arnaýly esepke alý komıtetiniń tóraǵasy Baǵdat Mýsın málim etti, dep habarlaıdy QazAqparat.

«Buryn tólengen aıyppuldar boıynsha sot oryndaýshylarynyń kelip  jatatyny týraly azamattardyń shaǵymdaryn jıi kezdestirýge bolady. Osy sebepti biz materıaldardyń shynaıylyǵyna sot oryndaýshylarynyń statıstıkalyq aqparatyn jan-jaqty tekserýdi bastap kettik. Nátıjesinde, atqarý isteri úshin ákimshilik polıtsııadan sot oryndaýshylaryna 52 myń materıal tólengen aıyppuldar boıynsha jiberilgeni anyqtaldy. Bul óz kezeginde aıyppuldy bekitilgen tártipte tólegen elimizdiń 52 myń azamatyna  sot oryndaýshylary keletinin bildiredi»,-dep jazdy Baǵdat Mýsın.

Quqyqtyq statıstıka jáne arnaýly esepke alý komıteti tóraǵasynyń sózine qaraǵanda, sońǵy aıda osyǵan jumyldyrylǵan qurylymdarǵa mundaı isterdiń 90 paıyzyn túzetip, olardy tártipke keltirý buıryǵy júkteldi. Qalǵan 10 paıyzy boıynsha tıisti jumystar júrip jatyr.

Atalǵan problemany júıeli túrde sheshý úshin jáne aıyppuldardy jazýdyń úderisin jeńildetý turǵysynda Ákimshilik ister tizilimi qurylýda, ıaǵnı ol aıyppuldar boıynsha Etalondy baza bolmaq. Osy oraıda elimizdiń  aýqymynda tıisti nátıje aldaǵy jyly baıqalatyn bolady.

«Qazirgi kezde týyndap júrgen máselelerdi naqty sheshý úshin, búginde atalǵan problemalar turǵysynda Qazaqstan azamattarynan aqparat alýǵa áleýmettik jelilerde (FB jáne Instagram) paraqsha ashý sheshimi jasaldy. Bul rette tólem qabyldanbaǵany nemese tólem jasalǵanymen, aıyppuldyń joıylmaǵandyǵy jaıynda aqparat jınaqtalady. Sonymen qatar adamdarǵa qolaıly bolýy úshin jaýapty ókiletti prokýrorlardy mamandandyrylǵan halyqqa qyzmet kórsetý ortalyqtaryna baǵyttadyq. Eger de tólem jasalǵanymen, aıyppul jabylmasa, atalǵan paraqshalarǵa ózińizdiń problemańyz jaıynda aqparatty túsire alasyzdar»,- dedi Mýsın.

Atap aıtqanda, endi aıyppuldar boıynsha týyndaǵan máseleler jaıly áleýmettik jelilerdegi «Shtrafy KZ» paraqshasynda jazba qaldyrýǵa bolady.