Baǵdat Mýsın «Qazaqtelekomǵa» qatysty atqarylatyn jumystardy atady
Búgin Májilistiń jalpy otyrysynan keıin tilshiler mınıstrden telekommýnıkatsııa salasyn demonopolızatsııalaý qadamdaryna qatysty surady.
«Jańa Qazaqstan aıasynda jańa sheshimderge jol berilip jatyr. Telekom naryǵynda básekelestikti ortany kúsheıtý nazarǵa alynyp otyr. Jalpy, buryn naryqta osyndaı jaǵdaı (monopolızm) bar ekenin únemi kóterip keldik. «Qazaqtelekomǵa» qatysty toqtalsaq, olarǵa eki operatordy satyp alýǵa ruqsatty men bergen joqpyn, olarǵa burynǵy Úkimet ruqsat berdi. Shamamen, 5 jyl buryn satyp alǵan bolatyn. 2020 jyldan beri biz olarǵa qatysty baqylaý jumystaryn kúsheıtip, ınternet sapasy boıynsha talaptardy qoıdyq», - dedi B.Mýsın.
Sonymen qatar mınıstr tıisti zań jobasy aıasynda depýtattarmen birlese tıisti aıyppuldar somasyn arttyrý máselesi talqylanyp jatqanyn jetkizdi.
«Taǵy bir másele – radıojıilikter monopolııasy. «Qazaqtelekom» AQ-ǵa barlyq radıojıilikterdiń 75 paıyzy tıesili ekenin, osyǵan qatysty tıisti sheshim jasaý usynysyn aıttym. 2021 jyly radıojıilikter boıynsha sot arqyly tıimdi paıdalanylmaǵan 8 oblys aýmaǵyna qatysty «Qazaqtelekomnan» radıojıilikterdi alyp qoıdyq. Qazir aýktsıon boıynsha olardy taratamyz», - dedi ol.
Munymen qosa mınıstr ótken jyly jańa operatorlardyń paıda bolýyna múmkindik berilgenin aıtty.
Budan buryn habarlanǵandaı, keshe Tsıfrlyq damý, ınnovatsııalar jáne aeroǵarysh ónerkásibi mınıstri B.Mýsın telekommýnıkatsııa salasyn demonopolızatsııalaý úshin qajetti birqatar uıymdastyrýshylyq jáne zańnamalyq sharalardy atap kórsetti. Ol «Qazaqtelekom» AQ telekommýnıkatsııalyq qyzmet naryǵynda tirkelgen baılanys qyzmeti boıynsha 80%-dan astam jáne mobıldi baılanys boıynsha 60%-dan astam úlesi bar monopolıst ekendigin jetkizdi. Telekommýnıkatsııa naryǵyndaǵy eleýli oryn «Qazaqtelekom» AQ kompanııalar tobyna basqa sabaqtas naryqtarda aıtarlyqtaı úles alýǵa múmkindik berdi.