Baǵdat Mýsın «feldsher sómkesi» jobasyna qoldaý kórsetýge ýáde etti
Baǵdat Mýsın Aqtóbe oblysy Qobda aýdany Taldysaı aýylyndaǵy medıtsına salasyna asa qajetti jańa jabdyqtyń jumysymen tanysty.
«Kishi medıtsına qyzmetkerleri mobıldi dıagnostıka keshenin meńgerip jatyr. Rıýkzaktaǵy qural 12 parametrli dıagnostıkaǵa arnalǵan. Plansheti de bar. Naýqastyń jaı-kúıi jaıly aqparatty onlaın alyp, ony bilikti dárigerge jiberemiz. Aýrýdyń aldyn alý, emdeý, ońaltý kezinde de naýqasty qashyqtan baqylaýǵa múmkindik bar. Bir adamdy teksekserý 15-30 mınýtqa sozylady», - dedi Aqtóbe oblystyq jedel járdem beketiniń feldsheri Aınur Januzaqova.
Jalpy, Aqtóbege 138 feldsher sómkesi alynady. Árqaısysynyń quny – 7,5 mln teńge. Shamamen 1 mlrd teńge jumsalady. Barlyǵy 285 sómkege suranys bar. Biraq, óńirdegi dárigerlik pýnktilerdiń 47%-ynda ınternet joq. Sondyqtan, ınternet jelisi tartylǵan soń tolyq qamtý josparda bar. Pılottyq joba qoldaý tapsa, meıirbıkelerdi oqytyp alý jetkilikti. Oǵan dárigerler qajet emes.
«Naýqas keldi. Іshi aýyryp tur. Soqyrishek bolýy múmkin. Meıirbıke qan analızin alý úshin aýdandyq aýrýhanaǵa jiberedi. Bul keshen bolsa, analız alyp, onyń qorytyndysyn shyǵarýǵa múmkindik beredi. Al, qalada bir dáriger bárin qarap, baqylap otyrady, baǵyttaıdy. Múmkindigi mol. Tipti, shaǵyn emhana qyzmetin bir sómke ishindegi qurylǵy atqara alady. Emdeý ornyna kele almaıtyn adamdarǵa dárigerler úıine barady. Jalpy, bul – TMD elderinde shyǵarylatyn apparat. Qosymsha quraldary shamamen 100 adamǵa qyzmet kórsetýge múmkindik beredi. Keıin bárin satyp alýǵa týra keledi. Sondyqtan, óndirýshi kompanııa Aqtóbede zaýytyn salýdy josparlap otyr», - dedi oblystyq densaýlyq saqtaý basqarmasynyń basshysy Rústem Isaev.
Baǵdat Mýsın mundaı jobanyń el úshin mańyzdy ekenin aıtty.
«Tsıfrlandyrý mınıstrligi jobany qoldaıdy. Bul – halyqqa kerek nárse. Halyqqa bilim, densaýlyq kerek. Bul usynys Úkimet basshysyna jetkiziledi», - dedi Baǵdat Mýsın.