Baǵdat Mýsın emtıhansyz júrgizýshi kýáligin alý eksperımenttiń nátıjesin aıtty

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın elordadaǵy mamandandyrylǵan halyqqa qyzmet kórsetý ortalyǵynda emtıhansyz júrgizýshi kýáligin alýǵa qatysty eksperımenttiń nátıjesin aıtty, dep habarlaıdy QazAqparat tilshisi.

«Tıisti komıssııa sheshim qabyldaıdy. Mınıstr retinde «Azamattarǵa arnalǵan úkimetke», ıaǵnı osy protsestermen aınalysatyn kompanııaǵa barlyq qajetti sharalardy qabyldaýǵa keńes berdim. Eksperımenttik tekserýmen ózim barǵan mamandandyrylǵan halyqqa qyzmet kórsetý ortalyǵynyń basshysy jumystan bosatylyp, jańa qyzmetker taǵaıyndaldy», - dedi B. Mýsın Senatta tilshiler saýalyna jaýap bere otyryp.

Osy oraıda ol mamandandyrylǵan HQKO-lardaǵy osy tektes zańsyzdyqtarǵa aldaǵy ýaqytta da tosqaýyl qoıylatynyn aıtty.

«Biz memlekettik qyzmetti jyldam formatta jáne jemqorlyq jaǵdaıyna jol bermeıtin qadamdarmen usynýymyz kerek. Zańnamadaǵy protsester qatań oryndalýy kerek. Ol úshin tehnologııalyq ınnovatsııalardy engizemiz, ıaǵnı bıometrııa men emtıhan tapsyrýshyny baıqap otyratyn tehnologııalar eskeriledi», - dedi mınıstr.

Budan buryn Baǵdat Mýsın ózi uıymdastyrǵan eksperımentti Instagram-da jarııalaǵan edi.

Onda mınıstr elordadaǵy mamandandyrylǵan halyqqa qyzmet kórsetý ortalyǵynda emtıhansyz júrgizýshi kýáligin alý úshin ýaǵdalasýy sátin túsirgen edi.

Keıinen vedomstvo basshysy júrgizýshi kýáligin alýǵa emtıhannan súrinbeı ótetinder sany kúrt azaıǵanyn jazdy.