Baǵdat Mýsın elordanyń sol jaǵalaýynda ınternettiń nasharlaý sebebin aıtty

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın elordanyń sol jaǵalaýynda ınternet-baılanystyń nasharlaý sebebin túsindirdi, dep habarlaıdy QazAqparat tilshisi.

«Eger úıdegi ınternet týraly aıtatyn bolsaq, 2020 jyldyń sońynan beri talaptardy engizdik jáne qurylys normalary men erejesinde ózgerister boldy. Bul rette turǵyn úı keshenderi tapsyrylǵan kezde optıkalyq jeli tartylýy kerek. Degenmen bazalyq stantsııalar boıynsha problema bar, ıaǵnı turǵyndar osy qurylǵylardyń ornatylýyna qarsy. Bizdegi zańnamaǵa qatysty aıtsaq, eger turǵyndar qarsy bolsa, onda operatorlar stantsııalardy alyp tastaýǵa májbúr», - dedi Májilistiń jalpy otyrysynan keıin tilshiler saýalyna jaýap bergen B.Mýsın.

Onyń aıtýynsha, operatorlar atalǵan máselege qatysty zańnamaǵa túzetýler engizýdi surap otyr.

«Qazir bul qadamdardy pysyqtap jatyrmyz. Depýtattarmen keńesip, tıisti zań jobasyn engizbekpiz. Bıyl baılanys salasynda birqatar ózgertýlerdi de engizemiz. Bul jańashyldyqtar baılanys sapasyna áser etedi. Osy oraıda operatorlarǵa aýyldar men qala mańyndaǵy baılanysty jaqsartýyna qatysty talaptar bolady. Bıyl barlyq túzetý qabyldanady degen oıdamyn», - dedi mınıstr.

Aıta keteıik, buǵan deıin QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Qazaqtelekomdy» demonopolızatsııalaý týraly túsinik berdi.