Baǵdat Mýsın: eGov Mobile múmkindikterin keńeıtý qajet
Vedomstvoaralyq komıssııanyń tóraǵasy-Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın anyqtamalar sanyn qysqartýdyń ózektiligin atap ótip, qajetti sharalardy jedel iske asyrý qajettigin aıtty.
«Memleket basshysy taıaýdaǵy Joldaýynda jıi suralatyn anyqtamalar men málimetti qaǵaz júzinde rastaýdy talap etýdiń kúshin joıý boıynsha naqty mindet qoıdy. Sondyqtan biz osy baǵytta jumys isteýimiz kerek. Búginge deıin 6 anyqtama joıyldy jáne oń ekonomıkalyq nátıjesin kórip otyrmyz. Bizge únemi jańa tásilderdi usyný, ýaqyttan qalyspaý, protsesti jyljytý, eGov Mobile múmkindikterin qoldaný jáne keńeıtý qajet», - dep atap ótti mınıstr.
Otyrys barysynda Tsıfrlyq damý mınıstrligine qarasty Memlekettik kórsetiletin qyzmetter komıtetiniń tóraǵasy Dáýlet Bekmanov atap ótkendeı, búginde memlekettik tizilimde 694 qyzmet bolsa, onyń 50-ge jýyǵy - aqparattyq qyzmetter men anyqtamalar.
«Biz birqatar mınıstrlikterdiń ókilderimen kezdesýler ótkizdik, azamattardan túrli anyqtamalardy talap etpeý máselelerin talqyladyq, nátıjesinde bıyl 30 túrli anyqtamany qysqartýdy usynyp otyrmyz.
Mysaly, narkologııalyq uıymnan, zeınetaqy jınaqtary týraly, jumyssyz retinde tirkelgeni týraly, jyljymaıtyn múliktiń mekenjaıyn anyqtaý boıynsha anyqtama berý, al sottalǵany nemese sottalmaǵany týraly anyqtamany elimizde talap etý alyp tastalynady, biraq shetelde kórsetý úshin qaldyrylady. Bul shara nátıjesinde qaǵaz qujat aınalymy 35 mıllıonnan astam qujatqa qysqartylady», - dep atap ótti Bekmanov.
Qaǵaz qujat aınalymyn azaıtý eGov Mobile mobıldik qosymshasyndaǵy jańa quraldardy da qysqartýǵa múmkindik beredi. Osylaısha, jaqynda eGov Mobile-dan aqparatty tikeleı messendjerler arqyly jibere otyryp, qosymshada jeke málimetterdi bólisýge bolady. Mysaly, kez kelgen yńǵaıly jolmen aqparatty jibere otyryp, qosymsha arqyly mekenjaı deregimen bólisýge bolady. Bul aqparatty talap etýshi mekemelerge eGov Mobile-den silteme jibere alasyz. Sol sııaqty, basqa jeke aqparatpen de bólise alasyz. Eger siz jaqyn jerde bolsańyz, onda málimetti QR kod arqyly almasý múmkin bolmaq.
Sondaı-aq úshinshi tulǵalar da aqparatty surata alady, ol úshin azamat óziniń smartfonyndaǵy qosymshaǵa kelgen habarlamany rastaýy kerek.
Budan basqa, eGov Mobile-dan elektrondyq tsıfrlyq qoltańbany (ETsQ) óte ońaı alatyn bolasyz. Ol úshin bıometrııany sáıkestendirýden ótý (júıe azamattyń jeke basyn skanerleıdi), suraqtarǵa jaýap berý, telefon nómirin engizý qajet, sodan keıin nómir mobıldi azamattar bazasynda tirkeledi, al ETsQ telefonǵa ornatylady. Bul protsess eGov Mobile-dyń kómegimen «elektrondyq úkimet» portalyn paıdalanýshylardy tirkeýdi ońaılatpaq.
Sondaı-aq, otyrysta azamattar neǵurlym kóp suraıtyn memlekettik qyzmetterdi ońtaılandyrý máseleleri qaraldy. QR Eńbek jáne halyqty áleýmettik qorǵaý mınıstrliginiń ókilderi kóp balaly otbasyna járdemaqy taǵaıyndaý, bala kezinen 1-toptaǵy múgedekke kútim jasaý, eńbek etý qabiletinen aıyrylý jaǵdaılaryna tólemder jáne t.b. qyzmetter kórsetý merzimderin qysqartý boıynsha bıznes-protsesterdi usyndy.
Sondaı-aq, kezdesýde Smart Bridge platformasyndaǵy ıntegratsııalyq servıster boıynsha bıznes ókilderiniń usynystary qaraldy.
Esterińizge sala keteıik, VAK otyrystary tsıfrlyq komıssarlardyń qatysýymen ótedi, olar da talqylanatyn máseleler boıynsha óz oı-pikirlerimen bólisedi.