Baǵdat Mýsın: Blokcheın tehnologııasyn engizetin boldyq
«Búgin áriptestermen birge jańa baspanany blokcheın tehnologııasymen onlaın tártipte resimdeý protsesin tanystyrdyq. Halyqqa qyzmet kórsetý ortalyqtaryna (HQKO) aǵylatyn adamdardyń suranysyn saraptaı kele, biz eń tanymal qyzmetterge zer saldyq. Mysaly, bıyl 9 aıdyń ishinde qazaqstandyqtar baspanany tirkeý úshin HQKO-ǵa 900 myń ret, notarıýsqa 700 myń ret júgingen. Sondyqtan biz blokcheın tehnologııasyn engizýge sheshim qabyldadyq. Osylaısha jyljymaıtyn múlikti tirkeý men ony kepilge qoıý úderisin jedeldetýge jol ashtyq»,-dep jazdy mınıstr.
Onyń aıtýynsha, mysaly jańa salynǵan úıden páterdi ıpotekaǵa satyp alýdy oıǵa alsańyz, qujattar jınap, tórt uıymdy - bank, notarıýs, qurylys ıesi men HQKO-nyń arasynda taban tozdyryp, qanshama sergeldeńge túsesiz. Eger biz bıyl osyndaı 900 myń keıs boldy desek, onyń ústine árbir jaǵdaı boıynsha álgi uıymdarǵa 2-3 ret barý qajettigin eskersek, nátıjesinde adamdar 3 mln ret árli-berli júgirýge májbúr bolǵanyna kóz jetkizýge bolady.
«Osy máselelerdi sheshý úshin biz qazir bıznestiń bastamasy boıynsha pılottyq jobany iske qostyq. Bank úderisin, sondaı-aq qurylys ıesi men memlekettiń, ıaǵnı «Azamattarǵa arnalǵan úkimettiń» úderisin biriktirdik. Biz memleket retinde adamdardy HQKO-ǵa barý mindetinen bosatyp, qyzmetterdi úıden shyqpaı-aq, ózderine qolaıly jáne tıimdi servıster arqyly alýǵa jaǵdaı jasaýǵa umtylyp jatyrmyz.
Eger bul máseleni bank nemese qurylys ıesi arqyly tikeleı sheshý múmkindigi bolsa, HQKO-ǵa barýdyń qajeti qansha?! Onsyzda memleket barlyq kelisim-sharttardy derekter bazasyna engizip otyrady.
Osy jobany júzege asyrǵan bizdiń mınıstrliktiń, Ádilet mınıstrliginiń, Bi Group, Halyk bank, Altyn bank jáne Azamattarǵa arnalǵan úkimettiń mamandaryna rızashylyǵymdy bildirip, alǵys aıtqym keledi»,-dedi Baǵat Mýsın.