Baǵdat Mýsın birinshi synyp oqýshylaryna jalǵa planshet berýdi usyndy
«Áriptesim Ashat Qanatuly (QR Oqý-aǵartý mınıstri – Ashat Aımaǵambetov – red.) usynǵandaı, «Aýyr rıýkzaktar» men mektepterdegi tsıfrlandyrý deńgeıin arttyrý máseleleri planshet qoldaný arqyly sheshimin tabýy múmkin. Planshetter tsıfrlyq oqýlyq retinde nemese úıden onlaın bilim alý quraly retinde qoldanýǵa oń áserin tıgizedi», - dedi B. Mýsın Úkimet otyrysynda.
Mınıstrdiń aıtýynsha, mundaı ádis birqatar damyǵan elderde, onyń ishinde Ulybrıtanııa, Norvegııa, Ońtústik Koreıa jáne Túrkııanyń mektepterinde jaqsy nátıjege ákeldi. Buǵan qosa, oqýshylar úshin shyǵarmashylyq pánder boıynsha óz kontentin jasaýǵa múmkindik beredi.
«Atalǵan elderde osy sheshim negizinde óńirler arasyndaǵy «tsıfrlyq» teńsizdikti tómendetý, oqýshylardyń rıýkzaktaryn jeńildetý baǵytynda maqsat qoıyldy. Bizdiń usynys – 2023 jyly 400 myńnan astam birinshi synyp oqýshylaryn servıstik model arqyly planshettermen qamtamasyz etý», - dedi ol.
Usynylyp otyrǵan mehanızniń birqatar artyqshylyqtary bar.
«Birinshiden, servıstik modeldi paıdalaný tikeleı satyp alýǵa qaraǵanda bastaýysh synyptarda 4 jylǵa arnalǵan kelisimshart somasyn bólý arqyly bıýdjetke júkteme azaıady. Bul mehanızm halyq pen bıznes arasynda telefondar men planshetterdi satyp alý kezinde belsendi tapsyrysqa ıe. Ekinshiden, planshetterdi jalǵa berý qyzmetinen basqa, oqýshylar úshin arnaıy tarıfpen mobıldi ınternet, planshetterdiń úzdiksiz jumysyn qamtamasyz etý úshin servıstik qyzmet satyp alynady.
Úshinshiden, ruqsat etilgen onlaın resýrstar tizimi, ıaǵnı «aq ınternet» qashyqtan jańartylyp otyrady. Eń bastysy, sheteldik óndiristerge táýeldilikti azaıtý maqsatynda, bul mehanızm tek otandyq óndirýshiler úshin ǵana qoljetimdi bolady», - dedi Baǵdat Mýsın.
Bul rette otandyq óndeýdi 3 kezeńge bólý usynylady.
«Birinshi kezeń - elimizde negizgi komponentterdi qurastyrý jelisin ornatý jáne odan mamandar daıarlaýdy qamtıdy. Ekinshi kezeńde jańa mamandardy oqytý úshin joǵary oqý oryndarymen jáne kolledjdermen sınergııa qajet. Úshinshi kezeń – planshetterdi jasaý kezinde praktıkalyq qoldanýǵa baǵyttalǵan R&D jumystarynyń jıyntyǵyn qamtıdy. Bul kezeńde ýnıversıtet túlekteri mıkroelektronıka salasynda jańa ónimderdi jasaýǵa qatysady», - dep túsindirdi Tsıfrlyq damý mınıstri.
Baǵdat Mýsın Oqý-aǵartý mınıstrligimen birlesip, bıylǵy 15 qarashaǵa deıingi planshetterge qoıylatyn negizgi talaptardy, onyń ishinde ınternetke qol jetkizýge arnalǵan senimdi saıttar tizimin bekitýdi, oqýshylarǵa planshetterdi satyp alý men berýdiń jyl saıynǵy mehanızmin anyqtaýdy usyndy.
«Qarjy mınıstrligimen birlesip, bıylǵy 1 jeltoqsanǵa deıin servıstik model boıynsha planshetterdi satyp alý máselesin pysyqtaý kerek. Bizdiń mınıstrlik baılanys operatorlarymen birlesip, planshetter men ınternettiń úzdiksiz jumys isteýi úshin servıstik qyzmet kórsetýdi qamtamasyz etsin», - dedi mınıstr.
Foto: wordpress.com