Baǵdat Mýsın bir kúnde 25 mlrd dollar tapqan «Alı baba» kompanııasyn úlgi etti

ASTANA. QazAqparat - Qazaqstandaǵy barlyq salaǵa tsıfrlandyrý júıesin tolyqqandy engizý úshin eldiń barlyq aýmaǵyn ınternetpen qamtamasyz etý kerek. QR Bas prokýratýrasynyń quqyqtyq statıstıka jáne arnaıy esepke alý jónindegi komıtettiń tóraǵasy Baǵdat Mýsın sarapshylar birlestigimen ótken ashyq dıalog barysynda osyndaı pikir bildirdi, dep habarlaıdy «QazAqparat» HAA tilshisi.

Aıta ketsek, sarapshylardyń bas qosýynda QR Ulttyq ekonomıka mınıstri Tımýr Súleımenov Qazaqstan Respýblıkasynyń 2025 jylǵa deıingi strategııalyq  damý josparyn tanystyrǵan bolatyn. Mınıstrdiń aıtýynsha, atalǵan qujatta 7 reformaǵa basymdyq beriletin bolady. Atap aıtqanda, qujattyń ekinshi tarmaǵynda «Tehnologııalyq jańarý jáne Tsıfrlandyrý» salasyna mańyz berilgen.

«Tsıfrlandyrý jeke emes, barlyq salaǵa qatysty ekenin kópshilik túsinip kele jatqan sekildi. Atalǵan qujattaǵy («QR 2025 jylǵa deıingi strategııalyq  damý jospary» - avt.) maqsattardy iske asyrý jolynda tsıfrlandyrý aıtarlyqtaı septigin tıgizedi. Álbette, «ekonomıka salalarynyń tsıfrlyq transformatsııasy» degen bir jaǵynan túsiniksizdeý uǵymǵa uqsaǵanymen, naqty aıtqanda - eń negizgi «ınfraqurylymnyń» osy ekenin aıta ketý kerek. Búgingi tańda sózsiz jedel túrde Qazaqstannyń barlyq aýmaǵyna, árbir aýyldarǵa áleýmettik jelilerdi qoljetimdi etý kerek. Strategııalyq josparda bul qadam bar. Men osyǵan qýanyp turmyn», - deıdi Baǵdat Mýsın.

Onyń aıtýynsha, tsıfrlandyrýdyń saýda salasyna da mańyzy zor. Baǵdat Mýsın bir kúnde qytaılyq «Alı baba» kompanııasy 25 mlrd dollarlyq saýdany (11 qarasha kúni) jasaǵanyn aıta kele, elimizdegi barlyq saýda júıelerin elektrondy relske túsirý kerektigin atap ótti.

«Eger memlekettik deńgeıde tsıfrlandyrý júıesi týraly aıtar bolsaq, biz bıznes-protsesterdiń barlyǵyn qysqartyp, tsıfrlandyrý júıesine kóshirý máselesine den qoıyp kelemiz. Densaýlyq saqtaý salasynda tsıfrlandyrý júıesin engizý jumysyna júıeli túrde kelgen durys. Eger naýqas aýrýhanaǵa tússe, dáriger onyń kelisimimen málimetter bazasyna kirip, naýqastyń qaıda, qalaı emdelgenin bile alady. Sol arqyly aldaǵy emin jalǵastyra beredi», - deıdi Komıtet tóraǵasy.