Baǵdat Mýsın bilim berý platformalarynyń básekelestigi týraly aıtty

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın bilim berý platformalarynyń úzdigi básekelestik tártibimen anyqtalatyndyǵyn aıtty, dep habarlaıdy QazAqparat tilshisi.

«Koronavırýstyq pandemııa kezinde bilim berý mekemeleri qashyqtan oqytýdyń qıyn jaǵdaılaryn qabyldaýǵa májbúr. Biraq bul másele básekelestik arasynda sheshilýi tıis. Bilim berý mınıstrligi osyndaı sheshimge keldi jáne biz ony qoldaımyz. Básekelestik túrde qazirgi kezde 13 platforma jumys istep kele jatyr. Jalpy, solardyń arasyndaǵy básekelestik sheshedi. Qaısysy naryqta jaqsy qyzmet kórsetse, sol platformalardyń qyzmetin oqýshylarǵa deıin jetkizemiz», - dedi mınıstr tsıfrlandyrý taqyryby boıynsha Senatta ótken Úkimet saǵatynda.

Onyń sózine qaraǵanda, tsıfrlyq kontentti damytý qajet. Osy oraıda tsıfrlyq oqýlyqtarǵa kóshýge ekpin qoıǵan jón.

Budan bólek, áleýmettik qatynastar salasyn tsıfrlandyrý aıasynda búginde mynadaı is-sharalar belsendi pysyqtalýda. Olar: áleýmettik tólemder úshin ID ámııan jasaý; zeınetaqy men áleýmettik tólemderdi avtomatty túrde esepteý; otbasynyń tsıfrlyq kartasy; áleýmettik tólemderdiń biryńǵaı tizilimi; eńbek sharty men eńbek kitapshalaryn onlaın nusqaǵa kóshirý.

Budan buryn habarlanǵandaı, mınıstr elimizde ınternettiń sapasyna qatysty túsinik berdi.

«Nege ınternet álsiz? Buǵan qatysty birneshe sebep bar. Birinshiden, bizde ınternet sapasy boıynsha qatań zańnamalyq talaptar joq. Ekinshiden, telekommýnıkatsııa jelisiniń 90 paıyzy radıorelelik jelide jáne áýe baılanys arnalary boıynsha salynǵan», - dedi Baǵdat Mýsın.