Baǵdat Mýsın Astanada ótken senbide ne sebepti ınternet bolmaǵanyn túsindirdi

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Astanadaǵy mıtıng kezinde ne sebepti uıaly baılanys ınterneti bolmaǵanyn túsindirdi, dep habarlaıdy QazAqparat tilshisi.

Aıta keteıik, 26 qarasha keshke qaraı bir saǵat shamasynda ınternet jyldamdyǵy azaıǵan edi.

«Sol kúni keshki saǵat toǵyz shamasynda Memlekettik tehnıkalyq qyzmeti tıisti aqparatty bergen bolatyn. Olar tıisti ınternet shlıýzdi qadaǵalaıdy. Sol ınternet shlıýzge beriletin elektr qýaty júıelerinde aqaý bolǵan. Osynyń saldarynan ınternet shlıýzdiń jumysy toqtap qaldy. Elektr jabdyqtary iske qosylǵan soń ınternet qaıtadan qosyldy», - dedi Baǵdat Mýsın Senat otyrysynan keıingi baspasóz máslıhatynda.

Budan buryn 26 qarashada Astana men Aqmola oblysynda nege ınternet bolmaǵany aıtylǵan edi.

Sonymen qatar, Astana qalasynyń polıtsııasy senbi kúni elordada bolǵan mıtıngti túsindirdi.