Baǵdat Mýsın 5G ınternet týraly: Qoldanystaǵy 4G-diń sapasyn jetildirsek te jaman emes

NUR-SULTAN. QazAqparat – QR Tsıfrlyq damý, ınnovatsııalar jáne aeoroǵarysh ónerkásibi mınıstri Baǵdat Mýsın kelesi jyly eldiń eń iri úsh qalasynda 5G ınternet tartylatynyn aıtty, dep habarlaıdy QazAqparat tilshisi.

«Meniń oıymsha, bıyl jyl sońyna deıin birneshe orynda – Almaty, Nur-Sultan, Shymkent qalalarynyń keıbir jerlerinde 5G ınternet ornatamyz. Al kelesi jyly osy qalalarda tutastaı ornatyp shyǵamyz degen oıdamyn», - dedi ol Úkimet otyrysynan keıin tilshilerge suhbat bere turyp.

Aıtýynsha, basqa óńirlerge 5G ınternet jetýi úshin áýeli radıojıilikterdiń aýktsıony jolǵa qoıylýy kerek.

«5G ınternet jetýi úshin radıojıilikterdiń aýktsıony kelesi jyly ótedi. Sol aýktsıon qorytyndysy boıynsha josparlaımyz. Ózderińizge málim, 5G taratý úshin ınvestıtsııa qajet. Quny 5 tıyndyq nárse emes. Sondyqtan óńirlerge sol tehnologııany aparý úshin iri qalalardyń ishinde ekonomıkalyq negizdi tabýymyz kerek. Operatorlar onyń negizin kórýi kerek. Jalpy qazir qoldanystaǵy 4G-diń sapasyn jaqsartsaq, ol da jaqsy. 4G jaqsy istep tursa, YouTube-ti de, Tik-Tok-ty da qaraı alady», - dedi mınıstr.

Foto: t.me/KZgovernment