Baǵdat Mýsın 100 myń joǵary bilikti IT-mamandy daıarlaý jumysyn túsindirdi

NUR-SULTAN. QazAqparat – Búgin Memleket basshysy Joldaýynda berilgen tapsyrmalardy oryndaýǵa arnalǵan Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın IT-mamandardy daıarlaý jumysyn túsindirdi, dep habarlaıdy QazAqparat.

«Memleket basshysy óz Joldaýynda atap ótkendeı, «otandyq IT-sektordy damytý jáne nyǵaıtý mańyzdy. Elge jas, bilimdi, yntaly mamandar qajet».

Búginde elimizde IT-sektorynda kadrlardyń aıtarlyqtaı joǵary tapshylyǵy qalyptasty. Bul ekonomıkalyq básekege qabilettilikke qoljetkizýge múmkindik bermeıdi», - dep toqtaldy B. Mýsın.

QR Prezıdentiniń 100 myń joǵary bilikti IT-mamandy daıarlaý jónindegi tapsyrmasyn iske asyrý maqsatynda mynandaı is-sharalar oryndalatyn bolady:

Birinshiden, jyl saıyn jeke IT-mektepterde oqytý úshin IT-vaýcherler beriletin bolady. Osylaısha, jeke aqparattyq tehnologııalar mektepteri naryǵyna qoldaý jasalyp, 2025 jylǵa deıin 20 myń IT-vaýcher beriletin bolady. Bul shara barlyq nıet bildirýshilerge naryqta qurylatyn joǵary dárejeli IT-mektepterinde IT-mamandaryn qaıta oqytýǵa múmkindik beredi.

«Ekinshiden, Bilim jáne ǵylym mınıstrligimen birlesip IT-mamandyqtary boıynsha baǵdarlamalardy ózgertýge daıyndyq júrgizilýde. Úshinshiden, ýnıversıtettermen aqparattyq tehnologııalar daǵdylary bar salalyq mamandardy daıarlaý maqsatynda IT-mamandyqtardy beıindi óndiristermen biriktirý boıynsha jumystar júrgizýde», - dedi mınıstr.

«Memleket basshysy belgilegen ekinshi baǵyty - ulttyq kompanııalardyń IT-naryǵymen tyǵyz ózara is-qımylyn qamtamasyz etý. Bul úshin otandyq baǵdarlamalyq qamtylym tizilimi ázirlenip qoıylǵan. Osy tizilim arqyly ónimderdi bir kózden satyp alý qarastyrylǵan. Budan basqa, búginde IT-naryǵy men ulttyq kompanııalar arasynda kollaboratsııany qamtamasyz etýge arnalǵan SIMP platformasy jumys isteıdi. Ulttyq kompanııalardy osy platformaǵa paıdalanýǵa tartatyn bolamyz. Sonymen qatar, IT-naryǵyn damytý maqsatynda 20 mln AQSh dollary somasynda venchýrlyq erte qarjylandyrý qoryn qurý pysyqtalyp jatyr. Munyń barlyǵy bizge, Qasym-Jomart Kemeluly atap ótkendeı, 2025 jylǵa qaraı IT-qyzmetteri men ónimderi eksportynyń kólemin keminde 500 mln dollarǵa arttyrý boıynsha alǵa qoıylǵan maqsatqa qol jetkizýge múmkindik beredi», - dedi mınıstr.