Baǵdat Manzorovtyń isiniń toqtatylýy: Óz ustanymymyzda qalamyz – Alık Shpekbaev

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev iri kólemdegi alaıaqtyq boıynsha ustalǵan Almaty oblysy ákiminiń orynbasary Baǵdat Manzorovqa qatysty istiń toqtatylýyna pikir bildirdi, dep habarlaıdy QazAqparat tilshisi.

«Biz óz pikirimizdi aıttyq, qazir eshteńe deı almaımyn. Bas prokýratýranyń jaýabyn alýymyz qajet. Protsedýralar bar, merzimder bar. Sondaǵy belgili bir deńgeılerdi ustaný qajet. Orynbasar orynbasarǵa jazýy kerek nemese men jazýym qajet. Biz óz kózqarasymyzdy aıttyq jáne óz ustanymymyzda qalamyz», - dedi A. Shpekbaev tilshilerge bergen suhbatynda.

Eske salsaq, Almaty oblysy ákiminiń orynbasary Baǵdat Manzorov ustalǵany týraly buǵan deıin habarlaǵan bolatynbyz. QR Sybaılas jemqorlyqqa qarsy is-qımyl agenttigi oǵan QR Qylmystyq kodeksiniń 190-baby, 2-bóligi, 2-tarmaǵy («Laýazymyn paıdalaný arqyly asa iri kólemdegi alaıaqtyq») boıynsha aıyp taqty.

Keıin Bas prokýratýra Baǵdat Manzorovqa qatysty qylmystyq is toqtatylǵanyn resmı túrde málimdedi. Kóp uzamaı sheneýnik óz qyzmetine qaıta kiristi.

Óz kezeginde agenttik Bas prokýratýranyń bul sheshimine narazylyq tanytty.