Baǵdarlamalardy qaıta ózgertpeıtindeı etip qabyldaý qajet – Máýlen Áshimbaev

<p>Úkimet saǵatynda Senat Tóraǵasy Máýlen Áshimbaev memleket pen bıznes arasyndaǵy qarym-qatynastyń jańa paradıgmasy qajet ekenin aıtty. Sondaı-aq, ol osy úderiske áser etetin memleket qabyldaǵan sheshimderdiń, qujattar men baǵdarlamalardyń sapasyna erekshe nazar aýdardy, dep habarlaıdy Kazinform.</p>

«Bızneske únemi kómektesip, «qolynan jetektep», qamqorlyq tanytyp otyrý kerek pe? Mundaı paradıgma qanshalyqty durys? Ýaqyt óte kele biz basqa baǵytqa bet burýymyz qajet. Ol qandaı bolýy múmkin? Biz memlekettik organdar tarapynan barlyq rásimderdi naqty belgileýimiz kerek. Qarjylandyrýǵa, belgili bir resýrstardy berýge baılanysty máselelerdi naqty kórsetýge tıispiz. Jerdi jalǵa berý, qandaı da bir jeńildikter qarastyrý, kómek nemese sýbsıdııalar bólý máseleleriniń bári ashyq bolýy qajet. Qazir tsıfrlyq tehnologııa dáýiri. Bárin kórip, tikeleı baılanyssyz baqylaýǵa bolady. Memlekettik organdar men bıznes arasyndaǵy qarym-qatynastyń osyndaı jańa paradıgmasyn qalyptastyrý, soǵan umtylý asa mańyzdy», – dedi Máýlen Áshimbaev.

Palata Spıkeri memlekettik baǵdarlamalardyń, sondaı-aq, qabyldanatyn sheshimder men qujattardyń sapasyna da nazar aýdaryp, bul baǵyt qaıta qaraýdy jáne pysyqtaýdy talap etetinin atap ótti.

«Qazir biz bir zańdy jylyna kem degende birneshe ret ózgertemiz. Osyndaı ózgeriske ushyramaǵan zań bar ma? Bul neni bildiredi? Bul memlekettik sheshimderdiń sapasy men olardyń qalaı daıyndalǵanyn kórsetedi. Memlekettik baǵdarlamalarǵa da qatysty másele osyndaı. Bylaı qaraǵanda, kóp qarjy bóletin sııaqtymyz. Biraq naqty nátıjeni kórmeımiz. Múmkin, bul rette asyqpaý kerek shyǵar. Onyń ornyna qabyldaıtyn sheshimdi jan-jaqty pysyqtap, barlyq múddeli tarappen tyńǵylyqty talqylaǵan durys bolar. Osylaısha, barlyq pikirdi eskerip baryp, qaıta ózgertpeıtindeı etip qabyldaý qajet. Sonda ǵana turaqtylyq bolady», – dedi Máýlen Áshimbaev.

Osyǵan baılanysty Senat tóraǵasy áriptesterin jańa Salyq kodeksin barlyq máseleni nazarǵa ala otyryp ázirleýge shaqyrdy.

«Bul Kodeks bıznespen aınalysýǵa, ony keńeıtýge, shaǵyn kásipkerlikten ortaǵa bızneske, ortadan iri bızneske kóshýge yntalandyratyn qujat bolýy kerek. Bizge bıýrokratııa qajet emes. Munda esep berý degen mınımým deńgeıde bolýy tıis. Onsyz da tsıfrlyq dáýirde bári aıqyn kórinip turady», – dedi palata spıkeri.

Budan buryn habarlanǵandaı, Senat tóraǵasy Reseıdiń qatysýymen Qazaqstanda salynatyn jylý elektr ortalyqtaryna qatysty pikir bildirdi.