Baǵdad Ámireev Ábý-Dabıdegi IYU Syrtqy ister mınıstrleri keńesiniń otyrysyna qatysty

ASTANA. QazAqparat - Túrki keńesiniń Bas hatshysy Baǵdad Ámireev 1-2 naýryzda Birikken Arab Ámirlikteriniń Ábý-Dabı qalasynda ótken Islam yntymaqtastyǵy uıymy (IYU) Syrtqy ister mınıstrleri keńesiniń 46-shy otyrysyna qatysty, dep habarlaıdy QazAqparat.

Túrki keńesiniń Bas hatshysy «Islam Yntymaqtastyǵynyń 50 jyldyǵy: órkendeý men damý úshin jol kartasy» taqyrybyna arnalǵan IYU Syrtqy ister mınıstrleri keńesiniń 46-shy otyrysyna qatysty.

Ábý-Dabıde Ázerbaıjan Syrtqy ister mınıstri Elmar Mamedıarov, Qazaqstan Syrtqy ister mınıstri Beıbit Atamqulov pen Qyrǵyzstan Syrtqy ister mınıstri Chıngız Aıdarbekovpen kezdesken Bas hatshy, Túrki keńesiniń atqaryp jatqan jumysy men bıyl Ázerbaıjanda ótetin Túrki keńesiniń aldaǵy sammıtine baılanysty daıyndyq máselelerin talqylady.

Bas hatshy Ózbekstan Syrtqy ister mınıstri Abdýlazız Kamılovpen ekijaqty kezdesý ótkizip, 2018 jyldyń 3 qyrkúıeginde Sholpan-Ata qalasynda ótken Túrki keńesiniń 6-shy sammıti barysynda Ózbekstan Respýblıkasynyń Prezıdenti Shavkat Mırzıeevtiń de atap ótkendeı, Ózbekstannyń ásirese ekonomıka salasynda belgili yntymaqtastyq jobalaryna qatysýy týraly pikir almasty.

Bas hatshy sondaı-aq Saýd Arabııasy Syrtqy ister mınıstriniń halyqaralyq uıymdar boıynsha orynbasary Ábdirahman Al Rıssı men Egıpet Syrtqy ister mınıstriniń orynbasary Ehab Mohamed Mostafa Faýzımen Túrki keńesi men IYU aıasynda ornatylǵan qarym-qatynastar týraly áńgimelesti.

Sonymen qatar, Bas hatshy Baǵdad Ámireev Musa Kýlaklykaıany (Túrkııa) IYU Bas hatshysynyń qarjylyq jáne ákimshilik ister boıynsha kómekshisi jáne Asqar Mýsınov (Qazaqstan) IYU Bas hatshysynyń ǵylym jáne tehnıka máseleleri boıynsha kómekshisi laýazymdaryna taǵaıyndalýlaryna oraı quttyqtap, jańa qyzmetterinde tabystar tiledi.